Zavrader d'ieli mineral sin la plazza da tancar
Il chantun Grischun paja ina contribuziun chantunala per installar zavraders d'ieli mineral cun collectur da glitta e cun arretaziun automatica. Il sustegn finanzial per ils projects da construcziun gida a reducir donns locals tras liquids che pericliteschan las auas (spezialmain ieli da diesel).
Sut tge cundiziuns survegn ins contribuziuns chantunalas?
- La controlla da la protecziun da las auas mussa ina mancanza.
- Il manaschi ha il dretg da survegnir pajaments directs. La proprietaria u il proprietari resp. la cultivatura u il cultivatur po far la dumonda.
- Il zavrader d'ieli mineral vegn duvrà almain durant ils proxims 5 onns.
- Ina permissiun da construcziun legalmain valaivla è avant maun.
- La contribuziun sto vegnir garantida avant il cumenzament da las lavurs da construcziun.
- I sto vegnir installà in zavrader d'ieli mineral cun collectur da glitta e cun arretaziun automatica.
- L'aua dal zavrader d'ieli mineral sto vegnir svidada en la chanalisaziun communala u en la puschinera.
- Las contribuziuns vegnan pajadas fin l'onn 2027 sut la premissa, ch'ils preventivs correspundents vegnian deliberads da la Regenza.
Co guarda ora il sustegn?
- I vegn pajada exclusivamain ina contribuziun pauschala als custs da material per in zavrader d'ieli mineral cun collectur da glitta e cun arretaziun automatica.
- Tariffa: 50 pertschient dals custs da material per in zavrader d'ieli mineral cun collectur da glitta e cun arretaziun automatica u maximalmain 4000 francs per manaschi.
- Per sanar zavraders d'ieli mineral gia installads na vegnan pajadas naginas contribuziuns.
- Per fixar la plazza da tancar cun ina cuvrida dira na datti nagin sustegn.
Tge documents ston vegnir inoltrads?
- dumonda (formular);
- plans da construcziun e plan d'allontanament da l'aua;
- offerta u calculaziun dals custs;
- fegl cun las datas tecnicas dal zavrader d'ieli mineral cun collectur da glitta e cun arretaziun automatica;
- permissiun da construcziun;
- en cas d'ina colliaziun cun la chanalisaziun communala: permissiun d'inducziun da l'Uffizi per la natira e l'ambient;
- rendaquint da construcziun e fotografias suenter la realisaziun ensemen cun la dumonda da pajament.