Novs manaschis agriculs (dentant betg midadas da la direcziun dal manaschi), cuminanzas da manaschi ubain er cuminanzas da secturs da manaschi ston vegnir renconuschids. Per quest intent stuais Vus inoltrar ina dumonda en scrit al UAG, e quai fin il pli tard ils 30 da november da l'onn precedent. Per in nov manaschi agricul As annunziais Vus cun il formular Landwirtschaftsbetrieb Neuanmeldung ed agiuntais ils documents giavischads.

Sche Vus fundais ina cuminanza da manaschi, ina cuminanza da secturs da manaschi u ina cuminanza CPE, alura stuais Vus inoltrar a nus dus exemplars dals contracts da cuminanza da manaschi per l'examinaziun. Ans annunziai er, sche Vus schliais furmas da cuminanza.

Tge è la premissa fundamentala, per ch'in manaschi vegnia renconuschì?

Tge che vala sco manaschi, è reglà en l'art. 6 da l'Ordinaziun davart la terminologia agricula e la renconuschientscha da furmas da manaschi (LBV; SR 910.91). L'art. 6 LBV prescriva principalmain, ch'in manaschi sto esser giuridicamain, economicamain, organisatoricamain e finanzialmain independent ed er independent dad auters manaschis. Plinavant sto il manaschi preschentar il terren, ils edifizis ed ils stabiliments sco ina unitad ed esser visibel sco tala.

Pertge sto in nov manaschi vegnir renconuschì?

Sch'i vegnan dumandads pajaments directs, è la renconuschientscha dal manaschi ina premissa da basa.

Jau vi fundar ina cuminanza da manaschi u ina cuminanza da secturs da manaschi. Nua chat jau infurmaziuns en chaussa? Datti contracts da model per cuminanzas da manaschi u da secturs da manaschi?

As annunziai per plaschair tar il Servetsch da cussegliaziun agricula dal Plantahof. Quel As po sustegnair tar l'elavuraziun dals contracts.