Sche las autoritads cumpetentas attribueschan als geniturs adoptivs futurs in uffant che correspunda a l'attest da qualificaziun, conceda l'autoritad centrala chantunala per l'adopziun la permissiun da prender si quel.

In uffant dastga vegnir recepì pir suenter che la permissiun è vegnida concedida. Tgi che prenda si in uffant d'in stadi commember da la convenziun da Den Haag senza permissiun, sa fa chastiabel e sto far quint da vegnir arrestà u da stuair pajar ina multa da fin a 20 000 francs e che l'uffant vegn plazzà en in'autra famiglia (art. 22 da la convenziun da Den Haag). Tgi che prenda si in uffant d'in stadi che n'è betg commember da la convenziun da Den Haag senza permissiun, sa fa chastiabel e sto far quint da vegnir arrestà u da stuair pajar ina multa da fin a 2000 francs e che l'uffant vegn plazzà en in'autra famiglia (art. 11 da l'ordinaziun davart l'adopziun [AdoV]).