Vopnas da famiglia
En l'Archiv dal stadi dal Grischun sa chatta la collecziun la pli gronda da vopnas da famiglias grischunas, e quai en emprima lingia en furma da diapositivs (ca. 7000 dias). Questa collecziun da vopnas po vegnir consultada cun agid d'ina cartoteca alfabetica. La collecziun è vegnida concepida sut l'archivari dal stadi, Rudolf Jenny, ils onns 1945 fin 1953 ed è pli tard vegnida cumplettada.
Per bustab inizial dal num da famiglia chattais Vus online in document da PDF cun in maletg da mintga vopna e cun las infurmaziuns respectivas da la fischa da la cartoteca. Supplementarmain stgaffescha la cartoteca da renviament colliaziuns tranter diversas vopnas resp. fischas.
La collecziun da vopnas da famiglia n'è betg mo vegnida cataloghisada tenor nums da famiglia, mabain supplementarmain er tenor las "figuras" resp. ils motivs che vegnan avant sin ellas. Quest access al cuntegn è da gronda valur per eraldicras ed eraldichers. Uschia pon vegnir eruidas svelt p.ex. tut las vopnas che mussan in urs.
Cartoteca da figuras
Cunter ina taxa pon vegnir retratgs tar l'Archiv dal stadi digitalisats en auta resoluziun u stampats da las singulas vopnas da famiglia (en colur u en alv e nair), senza garanzia per l'identitad genealogica ed eraldica.
La qualitad da las copias dependa fermamain da la qualitad dal diapositiv e n'è betg dapertut fitg buna.
Vopnas da las vischnancas e dals circuls
Decisiv per la preschentaziun e per la descripziun da la vopna dal chantun e da las vopnas communalas è il register digital da las vopnas dal chantun Grischun.
Qua chattais Vus era in digitalisat dal Cudesch da vopnas dal Grischun cun vopnas che n'èn betg pli valaivlas d'anteriuras vischnancas e dals anteriurs circuls sco er cun ulteriuras infurmaziuns davart las vopnas e davart l'eraldica.
Cudeschs eraldics
Il cudesch eraldic Amstein è ina collecziun cun differentas vopnas da famiglia grischunas ch'èn vegnidas rimnadas da Johann Rudolf Amstein (1777-1861). Tut las vopnas chattadas ha Amstein dissegnà da nov en ses stil premurus ed exact. Amstein era maior da la milissa chantunala grischuna, ma er in observader da la natira e dissegnader talentà. Ultra dal cudesch eraldic ha el dissegnà ina charta geografica dal chantun ed ha promovì ils fatgs da scola chantunals.
Il cudesch eraldic da Gieri Casura (1877–1939) cuntegna differentas vopnas da la Val dal Rain anteriur. Il genealog ed eraldicher autodidactic ha resumà «tut las vopnas da famiglia cuntanschiblas fin ussa da la Val dal Rain anteriur dal Grischun». Er el ha dissegnà da nov las vopnas chattadas. Il resultat è ina collecziun fitg detagliada cun vopnas coluradas da famiglias burgaisas. Il resultat è ina collecziun bella e detagliada cun vopnas coluradas da famiglias burgaisas. Copias d'auta resoluziun da las vopnas pon vegnir empustadas tar l'Archiv dal stadi.