Èsi pussaivel d'inoltrar ina glista sco proposta electorala, sch'ella na cuntegna betg uschè bleras candidatas e candidats sco quai ch'i èn d'occupar sezs en il circul electoral?
Gea. La lescha fixescha mo che la proposta electorala dastga cuntegnair maximalmain tants nums da persunas elegiblas sco quai ch'i èn d'eleger deputadas e deputads en il circul electoral (art. 8 al. 1 LECG). Percunter dastga ina proposta electorala cuntegnair damain nums che quai ch'i èn d'occupar sezs.
Dastga ina proposta electorala vegnir emplenida cun candidatas e candidats d'autras partidas u gruppaziuns?
Gea. Sin ina proposta electorala pon figurar er persunas d'autras partidas u gruppaziuns. En quest cas na dastgan questas persunas dentant betg esser menziunadas sin autras propostas electoralas. Sch'il num d'ina persuna proponida figurescha sin pliras propostas electoralas d'in circul electoral, vegn el stritgà immediatamain da tut questas propostas electoralas. Il medem vala, sch'il num d'ina persuna proponida cumpara sin propostas electoralas da plirs circuls electorals (art. 13 LECG).
Cura è l'ultim termin per annunziar las propostas electoralas?
Las propostas electoralas ston arrivar tar la cumissiun regiunala cumpetenta per il circul electoral fin il pli tard il 12avel glindesdi avant il di d'elecziun. Propostas electoralas inoltradas suenter quest termin na vegnan betg en consideraziun (art. 11 LECG). Per las elecziuns da renovaziun dals 15 da matg 2022 ston las propostas electoralas pia esser arrivadas fin il pli tard glindesdi, ils 21 da favrer 2022, a las 12.00, tar la cumissiun regiunala cumpetenta per il circul electoral.
Organisescha il chantun ina spediziun da reclama electorala per las glistas che candideschan?
Na. Igl è chaussa da las partidas politicas da s'organisar en quest reguard e da procurar per in'eventuala spediziun coordinada da material electoral politic.
Po ina partida far dar la vischnanca ils attests d'elegibladad per sias candidatas e ses candidats sco er las attestaziuns dal dretg da votar per las sutsegnadras ed ils sutsegnaders?
Gea. Las attestaziuns dal dretg da votar per las sutsegnadras ed ils sutsegnaders sco er ils attests d'elegibladad per las candidatas ed ils candidats pon vegnir procurads da las partidas tar las administraziuns communalas respectivas. I n'è betg necessari che las persunas pertutgadas ageschian persunalmain.