Voss post da consultaziun cura ch’ils meds da communicaziun na funcziunan betg pli en cas da catastrofas e situaziuns d’urgenza.
Catastrofas pon succeder adina e dapertut. Perquai èsi impurtant das esser preparà bain. En cas da catastrofa cura ch’ils meds da communicaziun na funcziunan betg pli, survegnis Vus infurmaziuns ed agid al lieu d’inscunter d’urgenza da Vossa vischnanca.
Actualmain n’èn nagins lieus d’inscunter d’urgenza en funcziun en il Grischun.
Il lieu d’inscunter d’urgenza – Voss post da consultaziun en il cas concret
Sche Vus duvrais sustegn en il cas da catastrofa u d’urgenza e la telecommunicaziun na funcziuna betg, è il lieu d’inscunter d’urgenza Voss emprim post da consultaziun uffizial.
Sche Vossa vischnanca è pertutgada d’ina catastrofa u d’ina situaziun d’urgenza survegnis Vus impurtantas infurmaziuns davart la situaziun al lieu d’inscunter d’urgenza.
Sche Vus duvrais agid u sche Vus purschais sez agid, serva il lieu d’inscunter d’urgenza sco post da consultaziun.
Al lieu d’inscunter d’urgenza savais Vus era far cloms d’agid. Per exempel sche la forza electrica è interrutta durant pli lung temp e la telecommunicaziun na funcziuna betg.
Posiziuns – Qua chattais Vus Voss lieu d’inscunter d’urgenza
Lieus d’inscunter d’urgenza èn marcads spezialmain cun ina tavla.
Per regla èn lieus d’inscunter d’urgenza en edifizis publics sco chasas da scola, hallas da gimnastica ubain hallas polivalentas, chasas communalas, lavuratoris communals, staziuns, euv. Las posiziuns èn elegidas uschè central ch’ins las po cuntanscher spert a pe, cun il velo u cun l’auto.
Lieus d’inscunter d’urgenza vegnan mess en funcziun mo en in cas concret. L’avertura da lieus d’inscunter d’urgenza vegn communitgada da las medias (gasettas, radio, TV) dad Alertswiss e da Vossa vischnanca.
Qua vegnis Vus a savair nua che Voss lieu d’inscunter d’urgenza il pli damanaivel sa chatta: www.notfalltreffpunkt.ch – u tar Vossa administraziun communala.
Ulteriuras infurmaziuns e glistas da controlla en cas d’ina mancanza d’energia u d’in blackout da la forza electrica: