La politica da segirezza svizra ha la finamira da proteger la populaziun da smanatschas e da privels. La protecziun da la populaziun furma in dals otg instruments da la politica da segirezza (politica exteriura, armada, servetsch d'infurmaziun, politica economica, Administraziun federala da duana, polizia, servetsch civil, protecziun da la populaziun) da la Svizra. Ella è in sistem da cooperaziun civil da las tschintg organisaziuns partenarias polizia, pumpiers, sectur da sanadad, manaschis tecnics e protecziun civila. Las organisaziuns partenarias han la responsabladad per lur champs d'incumbensas e sa sustegnan vicendaivlamain.

Eveniments quotidians vegnan dumagnads per regla sulettamain cun ils meds d'intervenziun da la polizia, dals pumpiers e dals fatgs da salvament sanitars. La protecziun da la populaziun vegn en acziun pir, sch'in eveniment pertutga communablamain l'organisaziun partenaria e sche quella vegn engaschada en cuminanza d'in Stab directiv chantunal. Quai è principalmain il cas tar catastrofas e tar situaziuns d'urgenza natiralas, tecnicas e socialas.

Responsabels èn da princip ils chantuns che concepeschan la protecziun da la populaziun en collavuraziun cun las vischnancas tenor ils basegns respectivs e tenor las periclitaziuns respectivas. Supplementarmain sto er la Confederaziun ademplir tschertas incumbensas (p.ex. coordinaziun, perscrutaziun, scolaziun).

L'armada n'è betg ina part dal sistem da cooperaziun protecziun da la populaziun. L'armada po dentant vegnir en funcziun en moda subsidiara tar catastrofas ed en situaziuns d'urgenza, sch'ils meds civils èn exaurids en vista persunala, materiala u areguard il temp ubain, sche resursas (p.ex. capacitads da transport, grev utensil da salvament) mancan. L'armada augmenta uschia la capacitad da tegnair la dira dal sistem da cooperaziun protecziun da la populaziun.