Il Departament d'infrastructura, energia e mobilitad (DIEM) ha prendì enconuschientscha da la petiziun «Ultima onur per la pli veglia luffa da la Svizra Akbara (F07)». El refusa la vendita dal cadaver da la luffa F07.

Il cumenzament da december 2023 han l'uniun Wolfshirten ed ulteriuras passa 200 sutsegnadras e sutsegnaders inoltrà la petiziun «Ultima onur per la pli veglia luffa da la Svizra Akbara (F07)» a l'Uffizi da chatscha e pestga (UCP) resp. a la cussegliera guvernativa dr. Carmelia Maissen, scheffa dal Departament d'infrastructura, energia e mobilitad. Cun la petiziun han els pretendì da vender il cadaver da la luffa-mamma dal triep dal Calanda (F07) dal chantun a l'uniun Wolfshirten. F07 era probablamain la pli veglia luffa-mamma enconuschenta fin ussa, che ha pudì vegnir observada en Svizra dapi l'extirpaziun dal luf. Ella vala sco l'emprima fundatura da triep ed è uschia senza dubi d'interess public, sco ch'igl ha num en la resposta dal departament a la brev da las petiziunarias ed dals petiziunaris.

Il cadaver duai vegnir rendì accessibel al Museum da la natira dal Grischun sco instituziun da furmaziun e da perscrutaziun chantunala d'impurtanza regiunala. Uschia po vegnir mussada en il museum, a l'exempel da la luffa F07, l'istorgia dals lufs en Svizra ed en spezial en il Grischun. Sch'ina preparaziun na duess betg esser pussaivla, resta il cadaver en il Museum da la natira dal Grischun per la perscrutaziun. Mez avust 2023 ha F07 stuì vegnir sajettada da la surveglianza chantunala da chatscha pervia da ses nausch stadi corporal e pervia da la mancanza d'ina reacziun da fugia.