Chaussas generalas

Ina permissiun da pratitgar dependentamain u independentamain in'activitad da gudogn per persunas cun il status S po vegnir dumandada a l'autoritad chantunala cumpetenta. La patruna u il patrun sto dumandar ina permissiun da lavur al chantun dal lieu da lavur, e quai avant ch'i vegn cumenzà cun la lavur. Il chantun examinescha, sche las cundiziuns da salari e da lavur vertentas vegnan ademplidas.

Per pratitgar in'activitad da gudogn independenta sto la persuna cun il status S dumandar ina permissiun da lavur al chantun dal lieu da lavur, e quai avant che cumenzar cun la lavur. Il chantun examinescha, sche las premissas finanzialas e da manaschi èn ademplidas per l'activitad en mira. Il chantun resguarda la situaziun speziala da las persunas cun basegn da protecziun.

En cas d'ina activitad da gudogn ordaifer il chantun vegn emessa – cunter ina taxa – ina disposiziun che permetta da pratitgar l'activitad ch'è menziunada en il contract da lavur.


Cumpetenzas / proceder

Sche la persuna che tschertga protecziun ademplescha la premissa fundamentala per pratitgar l'activitad da gudogn, sto la patruna u il patrun far la dumonda correspundenta (dumonda B1) cun in contract da lavur legalmain valaivel e cun ina copia dal passaport via la controlla d'abitants a la vischnanca da domicil* da la persuna che tschertga protecziun. La vischnanca da domicil transmetta ils documents da dumonda a l'Uffizi da migraziun e da dretg civil dal Grischun, partiziun Asil e return, nua ch'ils documents vegnan examinads consultond l'autoritad dal martgà da lavur. Sch'i n'existan nagins motivs da refusa, vegn la permissiun da lavur emessa en furma d'ina copia da la permissiun u en furma d'ina disposiziun. La copia da la permissiun u la disposiziun vegn consegnada a la controlla d'abitants. La persuna che tschertga protecziun dastga cumenzar la plazza pir, cura che la permissiun da lavur è avant maun als petents.

*Sche la persuna che tschertga protecziun mida ses lieu da domicil il mument ch'ella cumenza cun la lavur, sto la dumonda vegnir inoltrada a la vischnanca da domicil ch'è cumpetenta en il futur.