A l'occurrenza commemorativa dad oz sper il Fürstenwald a Cuira sa perstgisa il cusseglier guvernativ Jon Domenic Parolini en il num da la regenza dal chantun Grischun per la gronda dolur che las victimas da las mesiras repressivas per motivs da provediment e dals plazzaments en in lieu ester han stuì subir. En preschientscha da numerusas persunas pertutgadas è vegnì emplantà in bostg che duai far endament simbolicamain l'ingiustia commessa.

La regenza renconuscha che las autoritads cumpetentas en il Grischun han disponì u tolerà sistematicamain fin l'onn 1981 mesiras repressivas per motivs da provediment e plazzaments en in lieu ester e che uschia èsi vegnì commess ingiustia envers pliras milli persunas en il Grischun. La regenza roga per perdun las victimas da las mesiras repressivas per motivs da provediment e dals plazzaments en in lieu ester per la dolur ch'ellas han stuì subir.

Fin ils onns 1980 èn en Svizra ed er en il Grischun – en il rom da la legislaziun da quella giada – vegnids prendids davent plirs dieschmilli uffants e giuvenils da lur famiglias e plazzads en chasas u sin manaschis purils. Dunnas èn vegnidas sfurzadas d'acceptar in abort u in'adopziun da lur uffant. Persunas, da las qualas il cumportament na correspundeva betg a las valurs socialas e moralas da quella giada, èn vegnidas plazzadas administrativamain – per part senza decisiun giudiziala – en praschuns.

Segn da regurdientscha
Per bleras victimas da mesiras repressivas per motivs da provediment e da plazzaments en in lieu ester che pateschan per part fin oz da las consequenzas da quai ch'ellas han stuì far tras, èsi in giavisch che quai ch'è capità na vegnia betg emblidà. Perquai ha la regenza grischuna decidì ch'i duaja vegnir mess in segn da regurdientscha en il chantun Grischun per commemorar las mesiras repressivas per motivs da provediment ed ils plazzaments en in lieu ester d'avant l'onn 1981. Ella ha incumbensà ina gruppa da persunas pertutgadas e da spezialistas e spezialists d'elavurar propostas.

En preschientscha da bleras persunas pertutgadas ha il cusseglier guvernativ Jon Domenic Parolini emplantà in bostg a chaschun da l'occurrenza commemorativa. Quest bostg duai far endament simbolicamain l'ingiustia commessa. Tranter la via dal Fürstenwald ed il Prasserieweg duai vegnir concepì l'onn proxim in lieu da commemoraziun cun bancs e cun in bigl.

Plinavant ha la regenza concludì – per sensibilisar la publicitad – d'elavurar en il museum retic in'exposiziun temporara davart la povradad e davart las mesiras repressivas per motivs da provediment. Per ch'il tema possia vegnir accumpagnà da studentas e students sco er da persunas spezialisadas vegn preparà material d'instrucziun e da scolaziun en il rom da l'exposiziun.

Pass da fin ussa per la renconuschientscha
La regenza ha recepì e realisà cumplainamain las stentas da la confederaziun e dals gremis naziunals per l'analisa da las mesiras repressivas per motivs da provediment e dals plazzaments en in lieu ester sco er las recumandaziuns respectivas als chantuns.

Ella ha nominà il post da cussegliaziun da l'agid a victimas dal Grischun sco post da consultaziun per persunas pertutgadas, ha incumbensà l'archiv dal stadi dal Grischun da tschertgar las actas e da permetter l'invista da las actas a las persunas pertutgadas, ha acceptà il fond d'agid immediat e garantì meds finanzials per persunas pertutgadas ed ha incumbensà ina lavur da perscrutaziun davart l'istorgia grischuna concernent las mesiras repressivas per motivs da provediment ed ils plazzaments en in lieu ester, ch'ella ha preschentà a la publicitad.

Link: Lavur da perscrutaziun
Link: Pled commemorativ dal cussegl guvernativ Jon Domenic Parolini

Il chantun Grischun vegn a pajar facultativamain ina contribuziun al fond da solidaritad. Quai è in segn da renconuschientscha sco er ina contribuziun a la reparaziun da la dolur che las victimas han subì.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: departament d'economia publica e fatgs socials