Cumpetenza federala da la politica exteriura
Tenor l'art. 54 da la constituziun federala è la politica exteriura da princip chaussa da la confederaziun. La constituziun federala oblighescha dentant la confederaziun da resguardar las cumpetenzas dals chantuns e da defender ils interess da quels.
Dretgs da cundecisiun dals chantuns
L'art. 55 da la constituziun federala garantescha als chantuns il dretg da cooperar a la preparaziun da decisiuns da la politica exteriura da la confederaziun, sche lur cumpetenzas u lur interess essenzials èn pertutgads. La constituziun federala oblighescha la confederaziun d'infurmar a temp e detagliadamain ils chantuns sco er da consultar lur posiziuns. Sche las cumpetenzas dals chantuns èn pertutgadas, han lur posiziuns ina impurtanza particulara, ed ils chantuns han il dretg da cooperar en moda adattada a las tractativas internaziunalas.
En cas da contracts internaziunals han ils chantuns cumplementarmain il dretg da pronunziar ordavant lur posiziun en ina procedura da consultaziun tenor l'art. 147 da la constituziun federala.
La lescha federala davart la participaziun dals chantuns a la politica exteriura da la confederaziun concretisescha la cooperaziun dals chantuns sin stgalim da la lescha (link lescha).
Relaziuns dals chantuns cun l'exteriur
L'art. 56 da la constituziun federala dat als chantuns il dretg da far contracts cun l'exteriur sin lur champs da cumpetenza. Plinavant han ils chantuns il dretg d'avair contact direct cun autoritads estras subordinadas.
Decleraziun cun vigur lianta da contracts interchantunals
La nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF) detretscha las incumbensas e las finanzas. La NGF regla las incumbensas communablas da la confederaziun e dals chantuns sco er la collavuraziun interchantunala, en spezial la gulivaziun da las grevezzas en cas da champs d'incumbensa interchantunals. Tenor l'art. 48a da la constituziun federala po la confederaziun – sin dumonda da chantuns interessads – declerar contracts interchantunals sco generalmain liants u obligar tscherts chantuns da sa participar a contracts interchantunals sin tscherts champs d'incumbensa.