La constituziun dal chantun Grischun regla la cumpetenza per las relaziuns externas dal chantun. La lescha davart il cussegl grond regla plinavant las obligaziuns da la regenza en relaziun cun il cussegl grond.

Cumpetenzas dal cussegl grond

Il cussegl grond:

• approvescha ils contracts interchantunals ed internaziunals, uschenavant che la regenza n'è betg autorisada suletta da concluder tals (art. 32 al. 2 CC)
• sa participescha en furma adattada a la preparaziun da contracts interchantunals ed internaziunals impurtants (art. 32 al. 3 CC)

Cumpetenzas da la regenza

La constituziun chantunala dat a la regenza la cumpetenza:

• da represchentar il chantun vers l'intern e vers l'extern (art. 42 CC)
• da negoziar contracts interchantunals ed internaziunals sco er da concluder tals en sia cumpetenza d'ordinaziun (art. 45 al  2 CC)
• d'avair contact cun la confederaziun e cun ils auters chantuns sco er cun l'exteriur vischin, resguardond eventualas posiziuns dal cussegl grond (art. 47 CC)

Obligaziuns da la regenza

La legislaziun oblighescha la regenza:

• d'infurmar permanentamain e detagliadamain il cussegl grond davart projects impurtants en il sectur da la collavuraziun internaziunala ed interchantunala sco er davart il stadi da tractativas che sa chattan sin ses champ da cumpetenza (art. 67 da la lescha davart il cussegl grond)
• d'orientar ad ura las cumissiuns cumpetentas davart las proximas tractativas contractualas internaziunalas ed interchantunalas sin il champ legislativ e d'integrar adequatamain las cumissiuns en las tractativas (art. 68 da la lescha davart il cussegl grond)