Il traffic en las Alps ha da vegl ennà in potenzial da conflicts. La necessitad da stgaffir colliaziuns effizientas en territoris maltransibels stat en confrunt cun il basegn da segirezza da las viagiaturas e dals viagiaturs e cun il mantegniment da la sanadad da las abitantas e dals abitants. Problems cuminaivels en ils pajais da la ARGE ALP han procurà ch'ins ha stuì ir vias cuminaivlas per superar ils problems.

Il studi qua avant maun sa basa sin il concept da traffic precedent da la ARGE ALP da l'onn 1995 ed analisescha il svilup dal traffic da transit durant ils ultims onns sin ils pli impurtants passadis tras las Alps sin binaris u sin via sco er dal traffic public e dal traffic privat regiunal e local.

Tenor la definiziun da las cundiziuns generalas e da las pitgas las pli impurtantas da la politica regiunala da traffic vegnan examinads ils temas ch'èn relevants per tut ils pajais. Plinavant vegn er fatga l'emprova da crear ina basa per ina collavuraziun pli intensiva. In'attenziun speziala han ins dà a la coordinaziun dals differents meds da transport ch'ins sto vesair oz sco ina rait integrada.

La lavur redacziunala vi da quest rapport ha gidà a reducir ulteriuramain la distanza tranter ils pajais vischins ch'èn anc adina separads tras cunfins geografics, linguistics ed instituziunals. En il rom d'inscunters da funcziunaris d'aut rang èn vegnidas barattadas ideas ed experientschas e stgaffidas las premissas per ina coordinaziun pli intensiva en il rom dal traffic. Il niz da questa lavur è bler pli grond ch'il concept qua avant maun. Igl è ussa chaussa da las regenzas naziunalas respectivas da trair a niz questas enconuschientschas cuminaivlas per ina pli gronda efficacitad da las politicas regiunalas da traffic.

ARGE ALP (mo per tudestg)