La nova broschura da reputaziun da la polizia chantunala dal
Grischun, ch'è gist sortida da la stampa, sa preschenta en in vestgì
nunconvenziunal. Ella è cumparida en tut las trais linguas chantunalas e
cuntegna in gag spezial. A chaschun da l'emprima occurrenza
d'infurmaziun davart la proxima scola da polizia 2009/2010 ha il
cumandant Markus Reinhardt preschentà la broschura il mardi saira a
Cuira.
A chaschun da totalmain 7 occurrenzas d'infurmaziun en tut las
regiuns dal chantun vegnan persunas tranter 20 e 35 onns, che
s'interessan per la professiun da polizista u da polizist, a savair tut
ils fatgs impurtants davart la proxima scola da polizia. L'emprima da
questas occurrenzas ha gì lieu al Meiersboden a Cuira. Sco che Markus
Reinhardt, il cumandant da la polizia chantunala dal Grischun, ha ditg,
è la professiun da polizista u da polizist ina da las incumbensas las
pli bellas, ma er ina da las pli difficilas che noss stadi ha da surdar.
Oliver Moggi, il schef da scolaziun da la polizia chantunala dal
Grischun, ha orientà davart l'andament da la procedura da selecziun e
davart la scola da polizia da la Svizra orientala ad Amriswil. "La
variaziun da la professiun da polizista u da polizist è bain singulara",
ha punctuà Moggi, "cunzunt en in chantun uschè multifar sco il
Grischun." Ils proxims mais recrutescha la polizia chantunala dunnas ed
umens che cumenzan il 1. d'october 2009 la scolaziun da polizista u da
polizist a la scola da polizia da la Svizra orientala ad Amriswil.
Questa scolaziun dura in onn.
Broschura da reputaziun cun in caracter exclusiv
A chaschun da l'occurrenza d'infurmaziun ha il cumandant Reinhardt
er preschentà la nova broschura da reputaziun da la polizia chantunala
dal Grischun. En collavuraziun cun il graficher Rolf Vieli da l'atelier
WORTbild a Maiavilla è vegnida creada ina broschura da reputaziun
attractiva, concisa e bain legibla. Il graficher ha gì l'idea exclusiva
da zugliar in bindel da bloccada da polizia enturn las broschuras. Quai
sustegna il layout ed accentuescha il caracter singular da quest
stampat. En il center da la nova broschura stattan las particularitads
dal chantun Grischun sco er las incumbensas e las sfidas gist uschè
particularas che resultan qua tras per la polizia chantunala: la
situaziun topografica extrema davent da las autas muntognas fin als
guaudets da chastagners cun lur flair mediterran, las lungas distanzas
sur las vias dals pass sco er per lung da la A13, la populaziun dal
sulet chantun triling da la Svizra cun giasts da tut il mund, las
schanzas e las ristgas da nundumbraivels sports differents, l'equipament
tecnic modern, la scolaziun professiunala, la proximitad a las burgaisas
ed als burgais e bler auter.
Ulteriuras occurrenzas d'infurmaziun
Las ulteriuras occurrenzas d'infurmaziun davart la scola da polizia
2009/2010 han lieu sco suonda:
- Tavau: 22 d'october 2008, polizia chantunala, Promenade 85
- Silvaplauna: 22 d'october 2008, polizia da traffic
- Glion: 28 d'october 2008, hotel Eden, Via da la staziun
31
- Cuira: 28 d'october 2008, Meiersboden
- Roveredo: 29 d'october 2008, center regiunal da servetschs
- Tusaun: 29 d'october 2008, polizia da traffic, Palastrasse 3
Las occurrenzas cumenzan mintgamai a las 19.00 e duran ca. 1 ura.
Quelle: Kantonspolizei Graubünden