Ils 17 d'avust 2009 cumenza il nov onn da scola en la gronda part da las vischnancas grischunas. Tschients da scolaras e da scolars cumenzan la scola quest atun. La polizia chantunala dal Grischun sco er la CMP lantschan in'acziun cuminaivla per il cumenzament da la scola: en l'entir chantun vegnan repartidas l'emprima emna da scola chapitschas cotschnas a las scolarinas ed als scolarins da l'emprima classa. Questas chapitschas cun pala dattan en egl en il traffic sin via ed attiran l'egliada da las automobilistas e dals automobilists. Centrala è en quest connex la segirezza da las scolarinas e dals scolarins da l'emprima classa.

Cumplettada vegn l'acziun cun placats "Navaira, ti ta fermas per mai" e cun in pitschen regal en furma d'in sdratsch per nettegiar vaider, il qual duai procurar per ina vista clera per tut las participantas e per tut ils participants da traffic. Las collavuraturas ed ils collavuraturs da las basas da la polizia da traffic, dals posts da polizia sco er da l'instrucziun da traffic vegnan a survegliar las vias da scola durant las emprimas emnas. Gia la segunda emna da scola cumenza l'instrucziun da traffic en las scolinas. En spezial renda la polizia chantunala dal Grischun attents tut las participantas e tut ils participants da traffic a lur funcziun d'exempel. Tuts duessan esser conscients da quest fatg e gidar – cun lur cumportament – a cuntanscher ina buna instrucziun da traffic.

Cun exercitar sistematicamain situaziuns difficilas en il traffic sin via vegnan promovidas l'independenza e la confidenza en sasez dals uffants. Uffants emprendan il meglier, sch'els dastgan empruvar sezs insatge e sch'els dastgan far l'experientscha directa. Els emprendan bain, sche persunas ch'els enconuschan sco lur geniturs u lur tattas e lur tats sa cumportan correctamain e sche quellas persunas laudan las tentativas dals uffants. Quest trenament en il traffic facilitescha als geniturs da laschar ir lur uffants a pe a scola.


Tips per ina via da scola segira

• Accumpagnai Voss uffant pliras giadas sin la via da scola u tar il bus da scola. Na tscherni betg la via la pli curta, mabain la via la pli segira.
• Sche Vus giais a pigliar Voss uffant, spetgai directamain a la sortida da la scola e betg da l'autra vart da la via.
• Voss uffant duai spetgar tar la strivla melna, fin ch'ils autos èn sa fermads dal tuttafatg.
• Tramettai Voss uffant a temp a scola. Currim e prescha augmentan la ristga d'accidents.
• Faschai stim che Voss uffant sa fermia, avant che metter pe sin la via ("spetgar, guardar, tadlar, chaminar").
• Laschai ir a scola cun velo Voss uffant pir cura che Vus essas segirs ch'el vegn a frida cun il traffic e pir cura che la scola e cura che Vus chattais quai per bun. Insisti che Voss uffant portia ina chapellina e la purtai er sez.


Per manischunzas u per manischunzs vala:

• Faschai spezialmain attent en ils conturns da scolas sco er da fermadas dals bus da scola e dals meds da transport public.
• Reduci la sveltezza, sche Vus vesais uffants sper via e sajas pronts da fermar.
• Fermai adina dal tuttafatg Voss vehichel avant las strivlas melnas, sch'in uffant vul traversar la via. A chaschun da l'instrucziun da traffic emprendan uffants da traversar las strivlas melnas pir cura ch'in vehichel è sa fermà. Na faschai betg in segn cun il maun, l'uffant pudess uschiglio currer senza far attenziun d'ulteriurs privels (per exempel traffic d'autras direcziuns).

Gidai a render segira la via da scola da noss uffants!