La polizia chantunala dal Grischun organisescha dals 19 fin ils 31 d'october 2009 in'acziun da rimnada decentrala, nua pon vegnir consegnadas voluntarmain armas che na vegnan betg pli duvradas e che sa chattan en possess privat. La populaziun dal chantun Grischun po consegnar armas, accessoris d'armas, muniziun, cuntels, armas da soft air ed armas d'imitaziun a tut ils posts da la polizia chantunala ed a tut las basas da la polizia da traffic.

La consegna voluntara da l'arma u d'ina part da l'arma liberescha la possessura u il possessur da l'obligaziun correspundenta da la laschar registrar l'arma u da far ina dumonda da permissiun excepziunala. La consegna da l'arma vegn confermada en scrit. I vegnan acceptadas er armas militaras, sche l'administraziun militara las ha surdadas sco proprietad a la schuldada u al schuldà. Medemamain pon vegnir consegnadas voluntarmain tut las ulteriuras armas sco bittagranatas da la buis d'assagl 90, pistolas, revolvers, mitraglias e.u.v. I n'è betg pussaivel da cumprar armas consegnadas.

Ils lieus e las datas da la consegna

Dals 19 fin ils 31 d'october pon tut las armas vegnir consegnadas tar tut ils posts da la polizia chantunala e tar tut las basas da la polizia da traffic dal Grischun sco er tar la polizia chantunala a Cuira (commando/Ringstrasse 2). Las duas sondas dals 24 e dals 31 d'october èn averts tut ils posts da polizia da las 9.00 fin las 11.30. Ils auters dis, er ordaifer l'acziun da rimnada sco tala, pon las armas vegnir consegnadas durant las uras d'avertura dal spurtegl dal post da polizia respectiv (vesair www.kapo.gr.ch).

Obligaziun d'annunzia per armas e per parts da l'arma

Cun l'introducziun da las directivas da Schengen e da la revisiun naziunala da la lescha d'armas èn entradas en vigur ils 12 da december 2008 midadas essenzialas che pertutgan numerusas burgaisas e numerus burgais. La midada la pli impurtanta è quella che armas u parts da l'arma che n'eran fin ussa anc betg registradas ston vegnir annunziadas cun in formular fin ils 12 da december 2009. Questa midada pertutga per exempel buis u schluppets (schluppet d'infantaria G 11, carabinas 11 e 31), floberts, schluppets da chatscha a culp singul ed a pliras chonnas sco er reproducziuns da schluppets per chargiar davant en, schluppets cun magasin a maun ch'ins ha survegnì da confamigliaras u da confamigliars ubain da terzas persunas (ierta, donaziun, cumpra e.u.v.).

Armas ch'èn vegnidas cumpradas persunalmain en ina fatschenta d'armas u ch'èn vegnidas consegnadas da l'administraziun militara sco proprietad persunala, sco er armas che figureschan en la patenta da chatscha u en la carta europeica d'armas da fieu n'èn betg suttamessas a l'obligaziun d'annunzia.




Ulteriuras novaziuns

• Ina permissiun d'acquistar armas è necessaria er en cas d'ina acquisiziun tranter persunas privatas, analogamain a las disposiziuns davart il commerzi.
• Sche commerziantas e commerziants d'armas u sche persunas privatas vendan in'arma, ston ellas ed els trametter – per persunas che vivan en il Grischun – ina copia dal contract en scrit entaifer 30 dis a la polizia chantunala dal Grischun, post spezialisà "armas".
• Per l'export temporar d'armas da fieu en il traffic da persunas vers in pajais da Schengen basegni ina carta europeica d'armas da fieu (cf. p. 20 broschura "dretg d'armas").


Las armas ch'èn suttamessas a l'obligaziun d'annunzia pon vegnir annunziadas cun in formular a la polizia chantunala dal Grischun, post spezialisà "armas". En cas da dumondas dat il post spezialisà, telefon 081 257 75 70, gugent infurmaziuns. Infurmaziuns detagliadas chattais Vus sut www.kapo.gr.ch/Documentaziun/Armas. Là pon ins er chargiar giu ils formulars necessaris.