A partir dal 1. d'avrigl 2010 ston uffants sut 12 onns vegnir segirads en l'auto cun sistems da retegn correspundents, sco p.ex. sezs d'uffants u plimatschs da seser spezials. Quai ha concludì il cussegl federal. La polizia chantunala dal Grischun infurmescha en l'internet sut www.kapo.gr.ch davart las novaziuns las pli impurtantas.

Il cussegl federal ha concludì novas mesiras per promover la segirezza dal traffic. En autos privats ston uffants sut 12 onns seser a partir dal 1. d'avrigl 2010 en indrizs da retegn spezials, perquai ch'in accident po chaschunar grevs donns ad in uffant che n'è betg segirà correctamain. Il privel da vegnir blessà grevamain u mortalmain è set giadas pli pitschen per in uffant segirà che per in uffant betg segirà u per in uffant betg segirà correctamain. En cas d'accidents vegnan quests uffants catapultads tras il vehichel e siglian cun ina vehemenza enorma cunter il sez, cunter il levagl, cunter l'armatura u cunter la fanestra.

Augmentà la limita da vegliadetgna da 7 a 12 onns
Fin ussa valeva l'obligaziun da seser en sezs d'uffants per uffants fin 7 onns, da nov per uffants fin 12 onns. Tut tenor la paisa da l'uffant dovri in plimatsch da seser spezial, in sez d'uffants u in sez anatomic per pops. En plazzas che disponan mo d'ina tschinta da batschida ston uffants da 7 onns u dapli vegnir segirads mo cun questa tschinta e betg cun in indriz da retegn spezial. Exceptads da questa regulaziun èn uffants ch'èn gia pli gronds che 1,50 meters. Uffants pli vegls e pli gronds e persunas creschidas ston sa segirar cun las tschintas normalas. Tgi che na segirescha betg correctamain in uffant en l'auto privat, vegn chastià cun ina multa disciplinara da 60 francs, perquai ch'el transporta in uffant sut 12 onns che n'è betg segirà.

Standard da segirezza da la versiun 03 u d'ina versiun pli auta
Ils indrizs da retegn ston ademplir almain ils standards da segirezza da la cunvegna corre-spundenta da l'ONU en la versiun 03 u en ina versiun pli auta (Economic Commission for Europe; UN-ECE, nr. 44). Ils geniturs pon controllar quai sin l'etichetta respectiva a maun da la caracterisaziun 03 (u pli auta). Indrizs da retegn da las versiuns 01 u 02 na dastgan betg pli vegnir duvrads a partir dal 1. d'avrigl 2010.

Fegl d'infurmaziun da la polizia chantunala dal Grischun
Sin sia pagina d'internet www.kapo.gr.ch ha la polizia chantunala dal Grischun cumpilà en tut las trais linguas chantunalas in fegl d'infurmaziun davart las prescripziuns pli severas concer¬nent ils sezs d'uffants. Dapli infurmaziuns davart il tema "obligaziun da sezs d'uffants" dat er l'uffizi federal da vias (UVIAS) sin la pagina d'internet www.astra.admin.ch