"Hallo motociclist/-a ...tegna en egl tia sveltezza!" Quai è il titel da la campagna da prevenziun che cumenza la fin da matg e che ha la finamira da reducir il dumber d'accidents da moto. Ultra da la polizia chantunala dal Grischun sa participeschan er ils corps da polizia dals chantuns Tessin, Glaruna, Vallais, Uri e Berna a la campagna.
Sco gia ils onns precedents èn tranter il matg e l'october – sco segn exteriur da la campagna – puspè montads placats per lung dals trajects da moto ils pli frequentads. Da nov vegnan er emess spots al radio. En il center da la lavur da prevenziun stattan acziuns coordinadas, nua ch'i vegn tschertgà il discurs cun las motociclistas e cun ils motociclists e nua ch'i vegn repartì broschuras cun cussegls utils davart la prevenziun d'accidents. I sa chapescha dentant da sez ch'i vegnan er fatgas – en moda repressiva e planisada – controllas da traffic e da spertadad sin ils trajects da moto ils pli populars ed ils pli frequents.
Il dumber d'accidents cumprova la necessitad da la campagna
En il chantun Grischun èn capitads circa 250 accidents da moto l'onn passà. En quest connex èn vegnidas blessadas var 180 persunas e tschintg èn schizunt mortas. Passa 70 pertschient dals accidents da moto èn vegnids chaschunads da la manischunza u dal manischunz sez. Ina sveltezza memia auta, ina fallida tecnica da franar e da prender las stortas sco er inattenziun e distracziun èn ils motivs principals d'in accident. Las fermas forzas dal motor e la tecnica dal schassis raffinada na correspundan betg adina a las abilitads da manischar da la motociclista u dal motociclist.
Giudair las bellas varts dal motociclissem
Il chantun Grischun è in eldorado per mintga motociclista e per mintga motociclist. Ils numerus pass da las Alps e las vias da muntogna en noss chantun garanteschan in daletg pur per las motociclistas e per ils motociclists. La campagna da prevenziun per impedir accidents duai er contribuir al fatg che in e scadin possia vairamain giudair cun sia moto las vias dal Grischun e turnar suenter sia excursiun puspè saun e salv a chasa.
