Glindesdi, ils 16 u ils 23 d'avust 2010, cumenza per blers uffants en il Grischun ina nova part da la vita. Els van per l'emprima giada a scolina u a scola e fan là experientschas dal tuttafatg novas. La polizia chantunala dal Grischun e la polizia da la citad da Cuira lantschan ensemen cun la CMP in'acziun communabla per il cumenzament da la scola: en l'entir chantun vegnan repartidas l'emprim di da scola chapitschas cotschnas a las scolarinas ed als scolarins da l'emprima classa. Questas chapitschas cun pala dattan en egl en il traffic sin via ed attiran l'egliada da las automobilistas e dals automobilists.

Quai che chaschuna tensiun e che fa plaschair als uffants, sveglia savens sentiments maschadads u schizunt temas tar ils geniturs perquai che lur uffants scuntran sin lur viadi a scola er ils privels dal traffic sin via. Betg mo ils geniturs, mabain tut las participantas ed ils participants da traffic han ina gronda responsabladad e duessan enconuscher e chapir il cumportament dals uffants.

Esser spezialmain attenta u attent
Uffants han in ferm basegn da sa mover, reageschan en moda spontana ed èn incalculabels. Els n'enconuschan betg ils privels dal traffic sin via. Els èn pitschens e na pon per exempel betg anc vesair sur ils autos or. Tras questa vista limitada vesan ils uffants autos che s'avischinan pli tard che persunas creschidas. Ultra da quai sa laschan uffants disturbar pli facilmain e na pon betg valitar uschè bain las sveltezzas e las distanzas. Els n'èn er betg en il cas da classifitgar ramurs en moda correcta. Plinavant han blers uffants tema da vehichels. Perquai ston las manischunzas ed ils manischunzs far gronda attenziun, spezialmain en la vischinanza directa da chasas da scola e da scolinas.

Dapli controlla
Durant las proximas emnas vegnan las collavuraturas ed ils collavuraturs da la polizia da la citad e da la polizia chantunala a survegliar las vias da scola ed a far dapli controllas da la sveltezza enturn las chasas da scola. Gia la segunda emna da scola cumenza l'instrucziun da traffic en las scolinas. Cumplettada vegn l'acziun "Navaira, ti ta fermas per mai" en l'entira Svizra cun placats e cun in pitschen regal en furma d'in fazielet per nettegiar vaider, il qual vegn surdà a las participantas ed als participants da traffic. Vaiders nets duain esser in element en la segirezza dal traffic sin la via da scola. Sin l'emballadi dals fazielets per nettegiar vaider èn stampads cussegls per ils geniturs sco er per las participantas e per ils participants da traffic per dapli segirezza sin la via da scola.
 
Tips per ina via da scola segira
• Accumpagnai Voss uffant pliras giadas sin la via da scola u tar il bus da scola. Na tscherni betg la via la pli curta, mabain la via la pli segira.
• Sche Vus giais a pigliar Voss uffant, spetgai directamain a la sortida da la scola e betg da l'autra vart da la via.
• Voss uffant duai spetgar tar la strivla melna, fin ch'ils autos èn sa fermads dal tuttafatg.
• Tramettai Voss uffant a temp a scola. Currim e prescha augmentan la ristga d'accidents.
• Faschai stim che Voss uffant sa fermia, avant che metter in pe sin la via (motto: spetgar, guardar, tadlar, chaminar).
• Laschai ir a scola cun velo Voss uffant pir cura che Vus essas segirs ch'el vegn a frida cun il traffic e pir cura che la scola e cura che Vus chattais quai per bun. Insisti che Voss uffant portia ina chapellina e la purtai er sez.

Tips per manischunzas e per manischunzs
• Fermar dal tuttafatg
Fermar il vehichel dal tuttafatg en trais fin tschintg meters distanza da l'uffant. Uffants en la vegliadetgna prescolara u dal stgalim bass na pon betg anc valitar distanzas e sveltezzas. Er na chapeschan els betg ch'in vehichel ha ina distanza da franar ch'è pli curta u pli lunga, tut tenor la sveltezza. Uffants pensan che autos pon adina fermar immediatamain.

• Betg far segns
Far segns cun ils mauns u cun la glisch po intimar ils uffants da traversar il vial, senza far stim da l'ulteriur traffic. Sch'ina persuna creschida fa in segn cun il maun, vala quai per l'uffant sco appel da traversar immediatamain la via. El vegn a suandar quest cumond senza sa persvader, sch'in vehichel s'avischina da davos quel che ferma u da la direcziun opposta. Er èsi difficil per uffants da tschertgar il contact visual cun las manischunzas e cun ils manischunzs (vaiders colurads, egliers da sulegl e.u.v.). Perquai èsi impurtant per ils uffants ch'els decidan sezs cura ch'els pon traversar en moda segira la via.

• Avair pazienza
Uffants dovran temp per traversar la via. In uffant dovra l'emprima giada fin diesch secundas per sa decider. Bainbaud – cun la confidenza necessaria – sa reducescha il temp da decisiun considerablamain.

Questas reglas valan er, sche l'instructura u sche l'instructur da traffic exercitescha cun ils uffants!