Ils ultims dis ha la polizia chantunala dal Grischun survegnì da pliras locaturas e da plirs locaturs d'abitaziuns da vacanzas schecs sfalsifitgads ch'ellas ed els han survegnì d'uschenumnadas engianadras ed engianaders da differenzas da schecs. I vegn cusseglià urgentamain da betg entrar en talas fatschentas da finanzas.

Cun cudeschar abitaziuns da vacanzas u chombras d'hotel survegnan locaturas e locaturs d'abitaziuns da vacanzas u hotelieras e hoteliers adina puspè schecs cun in import ch'è pli aut ch'il tschains da locaziun cunvegnì u ch'il pretsch da la chombra d'hotel offrì. Suenter in pèr dis u emnas s'annunzian las engianadras ed ils engianaders cun l'avis ch'il schec saja per sbagl vegnì emess cun in import memia grond; ch'ins dessi tuttina far il bain e returnar la differenza per mandat.

Il schec vegn credità cun resalva
Sch'il schec passa in'emprima controlla, vegn creditada sia valur a la locatura u al locatur sin il conto da banca cun la remartga "cun resalva dal pajament". Pir pli tard, suenter avair assegnà l'import da differenza, sa mussi ch'il schec inoltrà era sfalsifitgà. En quest cas pretenda la banca enavos l'import ch'ella ha credità cun resalva. A la victima vegn chaschunà uschia in donn che n'è per regla betg pli reversibel. Pervia da quai recumonda la polizia chantunala dal Grischun da far affars cun persunas nunenconuschentas meglier cunter pajament bancar e da pajar la differenza en connex cun schecs ch'èn vegnids emess cun in import memia grond mo suenter che la banca ha examinà la garanzia.

Ulteriuras infurmaziuns e messadis d'avis actuals pon vegnir consultads sut www.fedpol.admin.ch (uffizi federal da polizia) e www.skppsc.ch (prevenziun svizra da la criminalitad).