Gia per la quarta giada sa participescha la polizia chantunala dal Grischun al di naziunal da la glisch che ha lieu quest onn gievgia proxima, ils 25 dal november. Cun differentas acziuns che stattan sut il motto "glisch – vesaivladad – segirezza", vegnan las participantas ed ils participants da traffic fatgs attents, quant impurtant ch'igl è en il traffic sin via che pedunas e che peduns èn bain visibels e che la glisch dals vehichels a motor e dals vehichels a duas rodas funcziuna. Per pudair reparar gist al lieu eventualas illuminaziuns defectas prendan part er patrugliadras e patrugliaders dal touring club da la Svizra (TCS) ad intginas controllas.

Cun controllas intenziunadas vegn la polizia da regiuns e da traffic ad examinar il funcziunament da l'illuminaziun e da l'equipament correct dad autos e da vehichels a duas rodas ed a sa drizzar directamain e persunalmain a las participantas ed als participants da traffic. Sut il motto "glisch – vesaivladad – segirezza" vegnan ellas ed els envidads da far pli sapientivamain attenziun a la vesaivladad en il traffic sin via. Per prevegnir ad accidents èsi numnadamain impurtant che persunas e che vehichels vegnian vesids baud. Blers accidents pudessan vegnir evitads, sche las manevras da franar e da guntgir vegnissan cumenzadas ad ura.

Privels spezials per manischunzas e per manischunzs da vehichels a duas rodas
La notg è la ristga d'in accident bler pli gronda ch'il di. Igl è evident ch'il vegnir vesì e ch'il vesair bain èn gist l'enviern – pervia da la stgirezza che dura pli ditg e pervia da las relaziuns meteorologicas – spezialmain impurtants. Pervia da lur siluetta graschla èn velos mal perceptibels la notg e perquai er suttamess ad ina gronda ristga d'accidents. Per quest motiv èsi fitg impurtant per els, ch'i vegnian respectadas e resguardadas las suandantas prescripziuns: Sin far notg, la notg e sche l'aura pretenda er il di ston velos esser illuminads cun ina glisch alva vers enavant e cun ina glisch cotschna vers enavos. Ultra da quai vegnan prescrits reflecturs – davant alvs e davos cotschens – sco er dus pedals glischants.

Vegnir vesì e vesair bain – Cussegls per la realisaziun
Ina participanta u in participant da traffic – e tar quels tutgan er las pedunas ed ils peduns – na sto betg mo vesair bain, mabain er vegnir vesì. Vesaivladad porta numnadamain dapli segirezza! La polizia chantunala dal Grischun appellescha perquai oravant tut a las pedunas ed als peduns, dentant er a ciclistas ed a ciclists sco er a manischunzas ed a manischunzs da mopeds, da purtar vestgadira clera u materials reflectants la notg u sin far notg. In avantatg da las mesiras da segirezza è ch'ellas pon vegnir realisadas en moda simpla. Tut las participantas e tut ils participants da traffic, sin rodas u a pe, giuvnas u giuvens, veglias u vegls pon, cun in sforz minimal, prestar lur contribuziun ad in augment da la vesaivladad ed uschia gidar ad augmentar l'atgna segirezza sco er tala da las autras participantas e dals auters participants da traffic. Ulteriuras infurmaziuns davart il di da la glisch datti en l'internet sut TCS.