Sin la rait da vias dal Grischun è capità l'onn 2010 en media mintga trais uras e mez in accident da traffic. Quai mussa la statistica d'accidents da traffic 2010 ch'è vegnida preschentada ad ina conferenza da medias a Cuira la gievgia suentermezdi. En preschientscha da la cussegliera guvernativa Barbara Janom Steiner, scheffa dal departament da giustia, segirezza e sanadad, ha Robert Willi, schef da la polizia da regiuns e da traffic da la polizia chantunala dal Grischun interpretà ed explitgà detagliadamain la statistica.

L'onn passà en capitads totalmain 2'519 accidents da traffic en il Grischun. Quai è in augment da 77 accidents ubain da 3.15 pertschient (2009: 2'442) cumpareglià cun l'onn precedent e correspunda a la media dals ultims tschintg onns. Questas cifras cuntegnan er ils cas da la polizia da la citad da Cuira. Perquai che cas da bagatella che na vegnan betg annunziads a la polizia na vegnan betg registrads en la statistica, na dastga il dumber total dentant betg vegnir chapì sco preschentaziun absoluta dals accidents. Ils blers accidents hai dà sin vias sitgas e sin trajects da via gulivs. Uschia dastgan ins supponer che automobilistas ed automobilists èn pli concentrads e pli attents, sche las cundiziuns sin via èn difficilas e sch'il traject è pretensius.

Augment marcant da victimas
L'onn 2010 han 30 persunas pers lur vita tar accidents da traffic. Quai èn 17 persunas dapli ch'igl onn precedent (13). Percunter è il dumber da persunas grevamain blessadas sa reducì per 19 pertschient sin 82 (101).

Reducziun dal dumber d'accidents grevs da moto
Il dumber da motociclistas e motociclists che han gì accidents mortals è s'augmentà da tschintg sin set. Quai correspunda a la valur da l'onn 2008. I sa tracta en quest connex da sis manischunzas e manischunzs e d'ina cunmotociclista u d'in cunmotociclist da motos grevs. Mo tar in da quests accidents da moto mortals èn terzas persunas stadas la culpa, tar tut ils ulteriurs èn las motociclistas ed ils motociclists stads sezs la culpa. En general èn 80 pertschient dals accidents da moto vegnids chaschunads da las motociclistas e dals motociclists sezs. Allegraivlamain èn sa reducids ils accidents cun motos per 21 pertschient da 229 sin 179. A medem temp è sa reducì il dumber da motociclistas e da motociclists blessads da 179 sin 132. Tar il dumber da persunas grevamain blessadas po schizunt vegnir registrada ina reducziun marcanta da 57 sin 25.

La via dal Güglia è il traject che ha chaschunà ils blers accidents
Da las vias chantunalas sa demussa la via dal Güglia tranter Casti e Silvaplauna cun 189 accidents da traffic annunziads - sco gia l'onn precedent (177) - sco traject cun ils blers accidents en il Grischun. Sin la via naziunala A13 tranter ils cunfins cun il chantun Son Gagl e cun il chantun Tessin èn capitads 222 accidents (192).

Blers accidents cun selvaschina
Il dumber d'accidents cun selvaschina è creschì per 24 pertschient da 708 a 882. Cun 35 pertschient èn ils accidents cun selvaschina ils accidents ils pli frequents en il chantun Grischun.

Il dumber da persunas blessadas il pli bass en l'istorgia
Tut en tut èn l'onn passà vegnidas blessadas 722 persunas tar accidents da traffic en il Grischun. Quai signifitgescha in dumber uschè bass sco quai ch'el n'è dapi l'onn 1966 betg pli vegnì cuntanschì. Da la statistica d'accidents da traffic cumpletta dal Grischun per l'onn 2010 po vegnir prendì invista sut www.kapo.gr.ch/documentaziun/statistica.