Ils motivs ils pli frequents per accidents da traffic èn la nunattenziun e la distracziun. Ultra d'ina sveltezza betg adequata ed ultra d'alcohol al guvernagl è quai in dals trais motivs principals per accidents. Ensemen cun auters corps da polizia da la Svizra orientala lantschan la polizia chantunala dal Grischun e la polizia da la citad da Cuira dals 20 da settember fin ils 16 d'october 2011 la campagna per la segirezza dal traffic "Pilotadi senza vista". Per lung da las vias fan ils placats "Pilotadi senza vista" attent als privels che stattan en connex cun distracziun.

Fatg èsi che manischunzas e manischunzs d'autos vegnan distratgs adina pli savens cur ch'els èn per via, perquai ch'ellas ed els fan diever dals meds da communicaziun ch'èn oz fitg derasads. Sche l'egliada guntgescha davent dal traffic er mo per paucs tschientavels d'ina secunda, sch'ils patratgs èn insanua auter, daventa l'occupaziun principala dal "charrar" ina chaussa secundara. Las pretensiuns envers las participantas ed ils participants al traffic daventan dentant adina pli grondas, cunzunt pervia da la densitad pli e pli gronda dal traffic.

La ristga d'accident s'augmenta per quatter giadas, sch'il telefonin scalina
Studis internaziunals renvieschan al fatg che cun telefonar, dentant er pervia d'autras distracziuns en l'auto, sa prolungheschan ils temps da reacziun per 30 fin a 50 pertschient. Main participantas e participants al traffic vegnan pertschavids e l'egliada è distanta da la via fin a quatter giadas pli ditg. Il mument dal discurs al telefonin, cun u senza indriz da telefonar a maun liber, s'augmenta la ristga d'in accident per quatter giadas. Decisiva è l'absenza dals patratgs. Las vias ed il traffic daventan ina chaussa secundara.

Nagina distracziun durant il viadi
La manischunza u il manischunz sto deditgar sia attenziun al traffic ed a la manipulaziun dal vehichel. Al principi dal viadi cumenza er l'obligaziun da la persuna al guvernagl da far tut il pussaivel per ch'ils auters participants al traffic na vegnian betg periclitads u schizunt blessads. Manischunzas e manischunzs d'autos ston er tralaschar tut quai che pudess chaschunar in tal privel. Quai na sa chapescha betg mo da sez, mabain è francà en il dretg davart il traffic sin via. Igl è scumandà da telefonar cun il telefonin cunter l'ureglia. Tgi che vegn tschiffà da la polizia, survegn ina multa. Medemamain èsi scumandà da scriver e da leger SMS. Quai vegn chastià cun la privaziun dal permiss da manischar e cun grondas multas. Durant la campagna vegnan intensivadas er las controllas areguard la distracziun.

Vossa polizia As recumonda

• Da duvrar la proxima guntgida per applitgar l'apparat da navigaziun.
• Indrizs da telefonar a maun liber èn in'opziun, han dentant er lur rampigns. La concentraziun tutga cumplainamain al traffic sin via.
• Sch'igl arriva in clom, surdar il telefonin al cunpassagier.

Ulteriuras infurmaziuns, cifras e fatgs davart la nunattenziun stattan a disposiziun en l'internet sut www.lenken-statt-ablenken.ch.