A chaschun d'ina conferenza da medias a Cuira è vegnida preschentada il glindesdi suenter mezdi la statistica criminala da la polizia (SCP). Da quella resorta ch'il dumber total da delicts en il Grischun è restà stabil. In fatg allegraivel è ch'ins ha pudì sclerir bunamain 90 pertschient da tut ils delicts da violenza, sco delicts da mazzament, grevas lesiuns corporalas u violaziuns.

La SCP vegn publitgada per la terza giada en questa furma. "Uschia èsi per l'emprima giada pussaivel da preschentar ina seria temporala", ha Gianfranco Albertini, schef da la polizia criminala da la polizia chantunala dal Grischun, ditg a las medias. La SCP vegnia fatga dapi 3 onns tenor criteris da retschertga unitars che valan en l'entira Svizra. Per trair conclusiuns davart il svilup da la criminalitad a lunga vista saja la statistica da 3 onns dentant anc memia pauc significativa, ha Albertini ditg vinavant.

Il dumber da delicts n'è betg reglabel
Per il cusseglier guvernativ Christian Rathgeb, schef dal departament da giustia, segirezza e sanadad, è la statistica criminala – ord vista politica – tant in indicatur per il grad da criminalitad da l'entir chantun sco er per la repartiziun dals eveniments delictuals entaifer il chantun. Ultra da quai mussia ella l'effizienza da la polizia criminala da la polizia chantunala, pia las atgnas pussaivladads da far frunt a la criminalitad en il chantun. "En la cumparegliaziun svizra è il grad da criminalitad en il Grischun tradiziunalmain plitost bass", ha ditg Rathgeb, rendend attent ch'il dumber da delicts na possia betg vegnir reglà da la polizia. "Influenzar il grad da criminalitad è ina incumbensa da l'entira societad, pia er ina incarica politica."

Cifras stabilas
L'onn 2011 èn vegnids registrads tut en tut 10'366 delicts en il Grischun (onn precedent: 10'494). La gronda part, numnadamain 8224 delicts (8427), èn stads delicts cunter il cudesch penal, suandà da las cuntravenziuns cunter la lescha da narcotics cun 1577 delicts registrads (1589).

Gronda quota da scleriment tar ils delicts da violenza
Tranter las persunas inculpadas èn dads en egl spezialmain savens umens tranter 15 e 25 onns. "Questa gruppa da vegliadetgna ha commess ils blers delicts tant cunter il cudesch penal sco er cunter la lescha da narcotics", ha declerà Albertini. Sco gia ils ultims 2 onns ha la regiun da Cuira gì la pli auta rata da criminalitad. Sin 1000 persunas èn vegnids registrads a Cuira passa 70 delicts. Per cumparegliar: Sin il medem dumber da persunas hai dà en Surselva mo circa 30 delicts. Sch'ins considerescha tut ils delicts ensemen, resulta ina quota da scleriment da circa 30 pertschient. Il dumber total da delicts da violenza è cumparegliabel cun ils dumbers dals onns precedents. Allegraivla è la gronda quota da scleriment en quest sectur. Areguard la repartiziun da las persunas inculpadas tenor vegliadetgna poi vegnir constatà che pli vegls ch'ils delinquents èn e pli greva che la violenza applitgada è.

Lantschà ina campagna cunter il skimming
La statistica mussa in augment extraordinari da cas da skimming. Per quest motiv è vegnida lantschada dacurt la campagna naziunala "Attenziun al skimming!". Er la polizia chantunala dal Grischun fa part da questa campagna. Skimming vul dir che engianaders s'acquistan illegalmain infurmaziuns da cartas da conto, da debit e da credit d'autras persunas per uschia pudair retrair daners da quests contos. Cun placats e cun infurmaziuns sin la pagina d'internet www.stop-skimming.ch duai la populaziun vegnir rendida attenta a quests privels. Cussegls simpels mussan, co ch'ins po sa proteger cunter il skimming.

La statistica criminala svizra po vegnir consultada tar l'uffizi federal da statistica sut www.statistik.admin.ch, la statistica detagliada per il Grischun stat a disposiziun sin la pagina d'internet da la polizia chantunala sut www.kapo.gr.ch.