Il glindesdi suentermezdi ha la polizia chantunala dal Grischun preschentà la statistica criminala da la polizia 2012 a chaschun d'ina conferenza da medias. Da princip poi vegnir constatà che tant il dumber total da delicts sco er la quota da scleriment èn restads stabils.

En il chantun Grischun èn vegnids commess l'onn passà 8890 delicts cunter il cudesch penal (CP). Quai è in augment da 666 delicts u dad 8 pertschient. En il sectur da la lescha da narcotics (LN) èn vegnids registrads 1509 delicts (onn 2011: 1577).

Tenor la tendenza svizra
L'augment dal dumber total da delicts correspunda a la tendenza svizra e po vegnir attribuì principalmain a la categoria da delicts da l'enguladitsch. Questa categoria è creschida per 10 pertschient, e quai da 3220 a 3546 delicts registrads. Mo gia il dumber d'enguladitschs cun infracziun è creschì per in terz, entant che la quota da scleriment è sa reducida levamain en quest sectur. Quai po vegnir explitgà cun in augment da delinquentas e da delinquents esters: quels n'èn betg anc registrads en las bancas da datas e lur fastizs na pon pia betg vegnir cumparegliads. Plinavant pon ins declerar quai cun in augment general da requirentas e da requirents d'asil sco er cun cumplicaziuns formalas pervia dal nov cudesch da procedura penala. 

La gronda part da las persunas inculpadas ha 20 fin 24 onns
Da las totalmain 1560 persunas inculpadas eran 782 Svizzers e 778 esters. L'activitad criminala la pli gronda han gì ils umens da 20 fin 24 onns. L'onn 2012 han ins registrà 221 umens da questa categoria da vegliadetgna sco inculpads, suandads da la categoria da 25 fin 29 onns e da la categoria da 40 fin 49 onns (mintgamai 198 umens inculpads). Dunnas èn vegnidas registradas bler pli darar. En la categoria da vegliadetgna da 20 fin 29 onns eran quai 60 dunnas, da 30 fin 39 onns 42 dunnas e da 40 fin 49 onns 50 dunnas inculpadas.

Delicts da violenza en il rom da l'onn precedent
L'onn passà èn vegnids commess 684 delicts da violenza. Quai èn 15 delicts dapli che l'onn precedent. 10 da quels èn stads grevs delicts da violenza, en spezial grevas blessuras corporalas. La quota da scleriment ha pudì vegnir auzada dad 88,3 pertschient a fitg buns 93 pertschient.

La populaziun duai gidar
En spezial en il sectur dals enguladitschs cun infracziun po la populaziun dar a la polizia indicaziuns d'investigaziun fitg utilas, cunquai che la polizia na po enconuschentamain betg esser dapertut. Perquai è la polizia dependenta da l'attenziun da las burgaisas e dals burgais. La campagna "Verdacht – Ruf an! Gemeinsam gegen Einbrecher" duai avair in effect preventiv e render attent d'annunziar immediatamain percepziuns suspectusas al numer d'urgenza 117. Infurmaziuns davart il tema protecziun cunter infracziun datti en l'internet sut www.kapo.gr.ch. Sco mesira directa or da las enconuschientschas da la statistica criminala 2012 vegn la polizia chantunala dal Grischun a mussar a medem temp dapli preschientscha, tras quai ch'ella fa pli savens controllas prioritaras en il sectur da la polizia criminala.

La statistica criminala stat a disposiziun sin la pagina d'internet da la polizia chantunala sut www.kapo.gr.ch.