Sonda, ils 9 da november 2013, han possessuras e possessurs d'armas en il Grischun per la segunda giada la pussaivladad da dar giu gratuitamain armas e muniziun tar mintga post da polizia da la polizia chantunala dal Grischun. Tar l'emprima acziun da quest gener avant quatter onns èn vegnidas dadas giu var 900 armas e 300 kilograms muniziun.

La lescha d'armas revedida ch'è en vigur dapi il december 2008 oblighescha ils chantuns da prender encunter gratuitamain armas e muniziun da possess privat. Da princip èsi da tut temp pussaivel da dar giu armas e muniziun tar la polizia chantunala dal Grischun. Acziuns concentradas han però l'avantatg ch'ellas chaschunan dapli attenziun e ch'ellas han pia in effect pli grond. Perquai ha lieu sonda, ils 9 da november 2013, per la segunda giada in di decentral per dar giu armas. Tut ils posts da polizia e tut las basas da la polizia da traffic da la polizia chantunala prendan encunter armas e muniziun tranter las 8.00 e las 12.00 sco er tranter las 14.00 e las 18.00.

Repetiziun mintga 3 onns
Possessuras e possessurs d'ina arma che dattan giu armas u muniziun, ston suttascriver al lieu ina decleranza da renunzia. Il post spezialisà per armas da la polizia chantunala dal Grischun ramassa las armas e la muniziun dadas giu e dismetta tut en moda professiunala. A chaschun da l'emprima acziun per dar giu armas l'onn 2009 èn vegnidas consegnadas var 450 armas d'ordonanza, 100 pistolas e revolvers, 200 armas da chatscha e da sport, 120 armas da piz sco er 300 kilograms muniziun. Quella giada ha l'acziun durà 2 emnas e var 500 burgaisas e burgais han profità d'ella. En il futur duai avair lieu mintga 3 onns in di per dar giu armas.