Sin las vias dal Grischun èn capitads l'onn passà var 30 pertschient accidents da traffic mortals damain che anc l'onn precedent. Sa reducì levamain è er il total da tut ils accidents da traffic. Restà praticamain tuttina è percunter il dumber da las persunas blessadas. Quai resulta da la statistica dals accidents da traffic 2013 ch'è vegnida preschentada gievgia suentermezdi a chaschun d'ina conferenza da medias.
"La statistica d'accidents qua avant maun na dastga betg vegnir chapida sco preschentaziun absoluta dals accidents effectivs," ha punctuà Barbara Hubschmid, scheffa da la polizia da traffic dal Grischun, gia al cumenzament. Ch'ils accidents che na vegnan betg annunziads a la polizia na sajan betg registrads en la statistica, ha cuntinuà Hubschmid. Il cusseglier guvernativ Christian Rathgeb, schef dal departament da giustia, segirezza e sanadad, ha ditg en l'introducziun: "Cun agid dals dumbers d'accidents vegnan definidas mesiras efficazias per prevegnir ad accidents." Che cun agid da quests dumbers fetschia la polizia chantunala dal Grischun in'analisa dals accidents e da las ristgas ed erueschia uschia il basegn d'agir, ha cuntinuà Rathgeb. "Plinavant inditgeschan las cifras, quant aut ch'il niz da la prevenziun d'accidents è per l'economia publica, pia sche l'engaschament è sa pajà."
La gronda part dals accidents da moto vegnan chaschunads da las motociclistas e dals motociclists sezs
Sco gia durant ils onns passads vegnan circa trais quarts da tut ils accidents da moto chaschunads da las motociclistas e dals motociclists sezs. Trais persunas han pers la vita en accidents da moto. Quai correspunda ad ina sminuziun da 50 pertschient envers l'onn avant. "Questa tendenza è legraivla, er sch'il dumber da las victimas è anc adina memia aut," ha declerà Hubschmid. Il dumber total da tut ils accidents da moto è puspè s'augmentà levamain l'onn 2013. Per far frunt a questa tendenza curra dapi il cumenzament dal 2013 fin probablamain la fin dal 2015 la campagna da prevenziun d'accidents "Smart Rider" cun l'occurrenza appartegnenta "Smart Rider Day" dals 14 da zercladur 2014 sin il terren dal center per la segirezza stradala Driving Graubünden a Cazas.
Il venderdi e la sonda capitan ils pli blers accidents
Sco gia durant ils onns passads èn capitads ils pli blers accidents in venderdi u ina sonda. "I dat en egl ch'in terz da tut ils accidents mortals èn capitads in venderdi," ha constatà Hubschmid. Ultra da quai mussia la statistica che la gronda part dals accidents saja capitada la saira suenter la lavur tranter las 17.00 e las 20.00. "Quai è d'attribuir al fatg ch'il traffic è fitg intensiv durant questas uras," ha declerà Hubschmid.
Er ils accidents da pedunas e peduns sminueschan
Er il dumber d'accidents da pedunas e peduns è sa sminuì. "Er quai è legraivel," ha ditg Hubschmid, "schebain che 3 peduns èn vegnids blessads mortalmain durant l'onn 2013. In da quels sin ina strivla melna a Claustra," ha cuntinuà Hubschmid. La peduna attempada saja stada vidlonder da traversar la strivla melna il mument ch'ella è vegnida tschiffada d'in auto da persunas, dal qual il manischunz era vegnì tschorventà dal sulegl. Rathgeb ha constatà pertutgant il tema accidents da pedunas e peduns: "Nagina strivla melna en il Grischun na resorta pervia d'in dumber d'accidents extraordinariamain aut, independentamain da sia moda da construcziun." I na dettia nagina caracteristica marcanta che possia vegnir cumbinada cun accidents.
La statistica detagliada dals accidents da traffic dal chantun Grischun po vegnir consultada en l'internet sin
www.kapo.gr.ch.