Glindesdi suentermezdi ha la polizia chantunala dal Grischun preschentà a Cuira la statistica criminala da la polizia 2013 a chaschun d'ina conferenza da medias. La situaziun dal total dals delicts e la quota da scleriment èn restadas stabilas cumpareglià cun ils onns precedents.

En il chantun Grischun èn vegnids registrads l'onn passà 10 337 delicts. Quai èn 537 damain che l'onn 2012. La gronda part èn acts chastiabels cunter il cudesch penal svizzer, numnadamain 8183 (onn precedent 8890). Tar ils delicts che pertutgan la lescha da narcotics è vegnì registrà in augment. Lur quota importa 15,9 % (onn precedent 13,9 %). Tranter las persunas inculpadas dattan en egl spezialmain savens umens tranter 20 e 30 onns da l'Africa dal nord e da l'Europa orientala.

Buna quota da scleriment tar ils delicts da violenza
Ils delicts da violenza cumpiglian violenza greva applitgada (mazzament, blessura corporala greva, violaziun), ma er blessura corporala simpla, rapina, constricziun, smanatscha e violenza a chasa. "Cun quests delicts è colliada in'energia criminala ch'è cleramain pli gronda che quella dals delicts ordinaris" ha punctuà Gianfranco Albertini, schef da la polizia criminala tar la polizia chantunala dal Grischun. Il dumber dals delicts da violenza da l'onn 2013 è cumparegliabel cun quels dals onns precedents. Da tut ils delicts da violenza ha la polizia chantunala dal Grischun sclerì 94,5 % (onn precedent 93 %).

Enguladitschs cun infracziun per lung da l'axa da transit
Las cifras actualas da la statistica criminala da la polizia sa chattan en il rom dals ultims 10 onns. In aut grad da criminalitad pervia d'enguladitschs cun infracziun ha il Grischun en spezial en la regiun dal Mesauc e per lung da l'axa da transit, punctualmain er en la periferia. Tar la categoria dals enguladitschs cun infracziun han pliras serias pudì vegnir scleridas. La quota da scleriment en quest sectur importa 21,2 % (onn precedent 12,9 %).

La polizia chantunala ha prendì mesiras
La polizia chantunala dal Grischun observa exactamain quest svilup da la criminalitad ed ha reagì sin quai. Uschia èn las activitads da controlla vegnidas intensivadas cleramain cun acziuns sistematicas en las regiuns pertutgadas. Questas acziuns sistematicas cuntinueschan. En quest connex collavura la polizia chantunala dal Grischun stretgamain cun la polizia dal Tessin, cun il corp da guardias da cunfin e cun las autoritads talianas. Cusseglier guvernativ Christian Rathgeb, schef dal departament da giustia, segirezza e sanadad, s'engascha per che la polizia chantunala possia disponer da dapli meds finanzials per dumagnar questa incumbensa che pretenda bler persunal. La segirezza da la populaziun ha per el l'emprima prioritad. Tenor Gianfranco Albertini è la collavuraziun da la populaziun fitg impurtanta gist en il sectur dals enguladitschs cun infracziun – observaziuns suspectas duain vegnir annunziadas immediatamain a la polizia.


Per in access direct stat la statistica criminala da la polizia 2013 a disposiziun sut www.kapo.gr.ch .