Sin las vias dal Grischun èn capitads durant l'onn passà circa 10 pertschient damain accidents da traffic che l'onn precedent. Tragic è il fatg che passa in terz dapli accidents da traffic han gì ina fin mortala. En tut han pers 16 persunas lur vita. Er il dumber da las persunas blessadas è s'augmentà per circa 5 pertschient. Quai resulta da la statistica dals accidents da traffic 2014 ch'è vegnida preschentada mardi avantmezdi a chaschun d'ina conferenza da medias.

"La statistica d'accidents qua avant maun na dastga betg vegnir chapida sco preschentaziun absoluta dals accidents effectivs", ha punctuà Barbara Hubschmid, scheffa da la polizia da traffic dal Grischun, gia al cumenzament. Ch'ils accidents che na vegnan betg annunziads a la polizia na sajan betg registrads en la statistica, ha cuntinuà Hubschmid. Walter Schlegel, cumandant da la polizia chantunala dal Grischun, ha ditg per introducir che a maun dal dumber d'accidents vegnian definidas bunas mesiras per prevegnir accidents. "Cun agid da questas cifras fa la polizia chantunala dal Grischun in'analisa dals accidents e da las ristgas ed eruescha uschia il basegn d'agir", ha cuntinuà Schlegel.

Ina prevenziun en cas d'accidents da moto è anc adina necessaria
"La lavur da prevenziun en cas d'accidents da moto vegn ad esser necessaria er en il futur", ha declerà Hubschmid. Il dumber dals accidents da moto e da las persunas blessadas è bain restà il medem. "Percunter han pers la vita l'onn 2014 dubel uschè blers motociclists sco anc l'onn precedent", cuntinuescha Hubschmid. Concretamain veglia quai dir ch'i ha dà 6 accidents mortals da moto e che 7 persunas èn mortas. Er Schlegel ha accentuà quant impurtanta che la prevenziun è, gist en connex cun accidents da moto. "Sco mesira preventiva sa participescha la polizia chantunala dal Grischun finanzialmain als curs da manischar ina moto che vegnan purschids dal center per la segirezza stradala DrivingGrischun", ha ditg Schlegel. In di da curs custa uschia empè da 199 francs mo pli 99 francs. Ils curs han lieu ils 22 da matg, sco er ils 12, 13 e 21 da zercladur.

Duas gruppas da vegliadetgna èn participadas principalmain als accidents
"Sch'ins considerescha las persunas participadas als accidents e las reparta tenor gruppa da vegliadetgna, vesan ins che la gruppa tranter 17 e 28 onns, sco er quella tranter 49 e 57 onns èn stadas participadas il pli savens ad accidents da traffic", ha declerà Hubschmid. Bler pli vasta saja la dimensiun tar las persunas disgraziadas mortalmain. Quella sa chattia tranter 7 ed 81 onns.

In'ulteriura reducziun dal dumber d'accidents vegn prendida en mira
Ch'i saja da valitar positivamain il fatg ch'il dumber total dals accidents saja sa reducì er durant l'onn 2014, ha resumà Hubschmid. "Tuttina resti nossa gronda finamira da reducir en il futur anc pli fitg il dumber d'accidents, e quai cun mesiras preventivas, repressivas ed er areguard la construcziun da vias". Pervia dal volumen da traffic che crescha permanentamain na vegnan ins er en il futur betg ad evitar dal tuttafatg ils accidents da traffic.