Dapi il 1. da fanadur 2015 è la polizia chantunala dal Grischun participada al post da polizia virtual Suisse ePolice. Sur Suisse ePolice pon vegnir fatgas denunzias sin via electronica.

 
Sin la plattafurma Suisse ePolice pon ins denunziar online l'enguladitsch d'in velo u d'in mofa, la perdita u l'enguladitsch dals numers d'immatriculaziun sco er simpels donns materials. La premissa per far la denunzia electronica è ch'ils delinquents na sajan betg enconuschents, ch'il lieu dal malfatg na cuntegnia nagins fastizs e ch'il denunziant abitia en il Grischun ubain ch'il lieu dal malfatg saja en il chantun. Plinavant pon vegnir chargiadas giu da la plattafurma la dumonda per la permissiun d'acquistar armas ed il contract en scrit per il transferiment d'ina arma.

Meglier service public
La plattafurma Suisse ePolice cumplettescha la purschida da servetschs da la polizia. En spezial pon vegnir registradas denunzias sur formulars electronics e transmessas a la polizia, senza stuair sa preschentar ad in post da polizia. L'utilisader spargna temp e po far sia denunzia da tuttas uras. A medem temp po la polizia reglar en moda pli effizienta las fatschentas en massa. La polizia chantunala dal Grischun sa participescha – en il rom da l'armonisaziun da l'informatica da la polizia – a 10 corps da polizia che porschan gia Suisse ePolice.