Sin las vias dal Grischun èn mortas l'onn 2016 14 persunas, 4 damain che l'onn precedent. 640 persunas èn vegnidas blessadas en accidents da traffic. En cumparegliaziun cun l'onn passà correspunda quai ad in augment da 7 persunas. Quai resorta da la statistica actuala d'accidents da l'uffizi federal da vias (UVIAS).
L'onn 2016 hai dà en il chantun Grischun totalmain 2288 accidents da traffic registrads da la polizia. Quai correspunda a la media dals onns 2011 – 2015 e dastga vegnir considerà sco positiv, sch'ins resguarda ch'il dumber da vehichels en il chantun Grischun è creschì er l'onn passà per circa 2200 vehichels a motor e che la populaziun è s'augmentada per circa 1000 persunas.
Dapli accidents cun donn material e da persunas
S'augmentads èn tant ils accidents cun donn material (+3,5 %) sco er quels cun donn da persunas (+2 %). Pauc allegraivel èsi plinavant che dapli persunas èn vegnidas blessadas grevamain (+10 %) en cumparegliaziun cun ils ultims 5 onns. Cun totalmain 14 persunas disgraziadas mortalmain dastga vegnir cumprovada – en cumparegliaziun cun l'onn precedent – ina diminuziun da 4 (-22 %). Quai correspunda a la tendenza dals ultims 5 onns. Ina leva diminuziun sa lascha registrar tar ils accidents da traffic ch'èn vegnids chaschunads sut l'influenza da narcotics e da medicaments sco er tar ils accidents chaschunads pervia d'alcohol. Allegraivel èsi plinavant che tant ils accidents sin autostradas (-15 %) sco er quels sin autovias (-5 %) èn diminuids.
Damain accidents mortals cun motos
Il dumber dals accidents cun motos è s'augmentà levamain en cumparegliaziun cun il nivel da l'onn precedent (+9 %). Entant ch'ins po constatar ina diminuziun tar las persunas disgraziadas mortalmain (-20 %), è s'augmentà il dumber dals motociclists blessads (+14 %). Er tar las persunas ch'èn sa blessadas en in accident cun in velo u cun in e-bike sto vegnir registrà in lev augment (+3 %). Entant ch'il dumber da pedunas e peduns blessads correspunda a quel da l'onn precedent, èn deplorablamain s'augmentads ils accidents mortals da traffic cun peduns. Da valitar sco negativ è il fatg che circa in terz da tut ils accidents cun pedunas e peduns èn capitads sin strivlas melnas.
Sveltezza memia auta e distracziun sco ristgas
350 accidents da traffic èn capitads pervia d'ina sveltezza memia auta. Quest augment per 15 % mussa che l'activitad da controlla è necessaria en quest sectur. La distracziun en il traffic sin via è fermamain derasada ed è ina gronda ristga. Quai demussa il fatg che circa 10 % da tut ils accidents da traffic capita pervia d'inattenziun e pervia da distracziun. Cun la campagna en il traffic sin via "na ta lascha betg distrair" dal post da consultaziun svizzer per la prevenziun d'accidents ppa vegnì empruvà da sensibilisar las manischunzas ed ils manischunzs per il privel da distracziun en il traffic sin via.