La polizia chantunala dal Grischun ha 5 novas polizistas e 12 novs polizists. Venderdi avantmezdi èn ellas ed els vegnids integrads en il corp en il rom d'ina festa che ha gì lieu en la sala dal cussegl grond a Cuira. Il 1. d'october cumenzan las emprimas aspirantas ed ils emprims aspirants la nova instrucziun da polizia che dura 2 onns.
Cun dar il maun sur la bandiera dal corp han las 5 novas commembras ed ils 12 novs commembers dal corp dà lur empermischun d'uffizi al cumandant, colonel Walter Schlegel. En sia allocuziun ha il cusseglier guvernativ Peter Peyer gratulà a las brevetadas ed als brevetads per l'examen professiunal federal reussì. A la ceremonia èn sa participads confamigliars, instructurs sco er numerus represchentants da la politica, da l'administraziun e d'organisaziuns partenarias. Sco ch'igl è tradiziun, è la festa da brevetaziun vegnida enramada da la musica da polizia dal Grischun.
Lieus da staziunament per il 1. d'october 2019
Las 5 novas commembras ed ils 12 novs commembers dal corp avevan cumenzà lur scolaziun l'october 2018 en la scola da polizia da la Svizra orientala ad Amriswil. Il 1. d'october 2019 entran ellas ed els en servetsch en ils suandants lieus da staziunament:
Bearth Flavian basa da la polizia da traffic Tusaun
Bebi Patrick post da polizia Zernez
Beer Adrian post da polizia Engiadin'ota-Bregaglia
Egle Svenja post da polizia Tavau
Engler Dario basa da la polizia da traffic Tavau
Fanzun Selina post da polizia Claustra
Ferreira Vanessa basa da la polizia da traffic Silvaplauna
Grischott Jan post da polizia Savognin
Kollegger Maja post da polizia Arosa
Kramer Sébastien post da polizia Engiadin'ota-Bregaglia
Kühne Marcus post da polizia Scuol
Rettich Nico post da polizia Schiers
Rudolf Sascha Hans basa da la polizia da traffic Tavau
Rühl Daniel post da polizia Puschlav
Schuler Pascal post da polizia Glion
Tassone Gianluca post da polizia Tavau
Nova instrucziun da polizia da 2 onns
Medemamain il 1. d'october 2019 cumenzan 5 aspirantas e 14 aspirants da la polizia chantunala dal Grischun l'instrucziun da polizia en la scola da polizia da la Svizra orientala ad Amriswil/TG. Da nov dura l'instrucziun 2 onns. Uschia stat a disposiziun dapli temp per l'instrucziun pratica en il corp d'origin. Per las aspirantas ed ils aspirants da lingua taliana cumenza la nova instrucziun da polizia il 1. da mars 2020 en la scola da polizia a Giubiasco/TI.
Focus sin la teoria e sin la pratica
Durant l'emprim onn d'instrucziun passentan las aspirantas ed ils aspirants la gronda part da lur temp d'instrucziun en la scola da polizia. Questa instrucziun ch'è orientada a la pratica vegn interrutta tras in praticum d'introducziun da 2 mais tar il corp d'origin. Là vegn cumbinada la savida teoretica cun las abilitads praticas. Cun absolver l'examen davart la capacitad d'intervenziun (ECI) vegn terminà l'emprim onn d'instrucziun. Quest examen è unifitgà en l'entira Svizra. Il segund onn d'instrucziun metta il focus sin l'acquist da savida pratica. Las polizistas ed ils polizists fan il praticum tar la polizia da regiuns, nua ch'ellas ed els vegnan assistids d'accumpagnaders da la pratica sco er da menturs.
Ultima festa da brevetaziun en quest rom
Suenter l'examen professiunal federal ha lieu la saramentaziun a chaschun da la festa da brevetaziun. En l'avegnir vegn la festa da brevetaziun celebrada ensemen cun la festa da promoziun. Pervia da l'instrucziun da 2 onns ha questa occurrenza lieu la proxima giada la fin da settember 2021.
