Immediatamain suenter las vacanzas da stad han las instructuras ed ils instructurs da traffic da la Polizia chantunala dal Grischun cumenzà a dar l'instrucziun da traffic en tut las scolinas. Fin la fin d'october èn vegnidas visitadas tut las scolinas.

Suenter ina curta teoria en scolina èsi vegnì mussà a tut en tut passa 3500 uffants, co sa cumportar sin il trottuar e co traversar la via cun e senza strivlas melnas.

"Sa fermar, laschar passar"
Durant l'instrucziun han ils uffants emprendì da traversar la via mo, sch'ils vehichels sa ferman directamain davant la strivla melna e sche las rodas èn fermadas dal tuttafatg. Igl è fitg impurtant che tut las participantas e tut ils participants dal traffic sajan conscients da quai e sa cumportian er uschia. Quai permetta da procurar cuminaivlamain per ina buna segirezza stradala sin las vias da scolina e da scola.
In grond giavisch da las instructuras e dals instructurs da traffic da la Polizia chantunala dal Grischun è quel, ch'ils geniturs accumpognian lur uffants a pe sin lur via a scolina il cumenzament da l'onn da scola. Uschia vegnan ils uffants pli segirs e pon suenter sa mover independentamain en il traffic. Ils servetschs da taxi dals geniturs a scolina ed a scola n'èn betg utils per la segirezza dals uffants e ston vegnir reducids sche pussaivel sin il minimum. Tras quests viadis cun l'auto van er a perder ils contacts socials dals uffants, ils quals vegnan tgirads e vivids sin la via a scolina.

Appel a las manischunzas ed als manischunzs
En il senn da la segirezza da tuts sin las vias, en spezial dals uffants, n'As laschai distrair da nagin e da nagut sin via. As fermai dal tuttafatg e directamain davant las strivlas melnas, sche uffants vulan traversar la via u ina strivla melna. Pertge ch'i vala: Sa fermar, laschar passar!