Dapi l'onn 2012 porscha la Polizia chantunala dal Grischun ina app. Grazia a quest servetsch pon la populaziun dal Grischun ed ils giasts s'infurmar en moda cumplessiva davart temas da la polizia. L'app è ussa vegnida concepida da nov e persvada cun ina preschentaziun moderna.

Sajan quai communicaziuns a las medias, infurmaziuns davart il stadi actual da las vias, il bulletin da lavinas per il chantun Grischun, cussegls per la prevenziun da crims, chaussas interessantas davart la professiun da polizista u da polizist ubain investigaziuns publicas. Dapi l'onn 2012 ha la Polizia chantunala dal Grischun in'app che porscha questas ed ulteriuras infurmaziuns. Suenter che la grafica da l'app è vegnida adattada intginas giadas en il decurs dals onns, è l'app ussa vegnida renovada en moda cumplessiva e sa preschenta da nov en in stadi modern. In'attenziun speziala n'è betg mo vegnida dada a differentas optimaziuns, mabain er a la preschentaziun confurma al temp dad oz cun ina meglra survista e legibladad. Per exempel profitescha la rubrica "News" da tut las adattaziuns sco er supplementarmain d'ina preschentaziun pli survesaivla dals maletgs.

L'app sco plattafurma d'infurmaziun appreziada
La gronda part dals access vegn dumbrada en la rubrica "News" cun las communicaziuns a las medias. Medemamain appreziada vegn la survista dal stadi da las vias sin la rait da vias chantunalas dal Grischun. Per mais vegnan registrads var 210 000 access, quai che cumprova l'interess da las Grischunas e dals Grischuns sco er dals giasts dal chantun per l'app da la Polizia chantunala dal Grischun. Quai mussa ina cumparegliaziun cun il dumber d'abitantas ed abitants dal chantun Grischun a la fin da l'onn 2019: 198 500 persunas. L'app è gratuita e po vegnir chargiada giu dals stores ubain actualisada a la nova versiun al lieu installà.  

Link App Store