Il dumber da denunzias pervia da transacziuns finanzialas fraudulentas è creschì cuntinuadamain ils ultims onns. Per bloccar la circulaziun dals daners lantscha la Polizia chantunala dal Grischun in project da pilot.
La Polizia chantunala dal Grischun ha gia avertì pliras giadas, l'onn 2020 trais giadas, cun communicaziuns a las medias d'engions cun investiziuns da daners online sco furma spezialmain frequenta da l'engion en l'internet. Sulettamain ils cas ch'èn vegnids denunziads l'onn 2020 en il chantun Grischun han gia chaschunà in donn finanzial da var 3,5 milliuns francs.
Engianadras ed engianaders malizius
Savens stgaffeschan las engianadras ed ils engianaders ina relaziun da confidenza, per ch'i vegnia investì daners. Virtualmain vegnan cumprovads e per part schizunt pajads or gudogns. Las persunas donnegiadas vegnan animadas d'investir anc dapli daners, fin ch'il contact vegn interrut successivamain u fin ch'il conto è vid. En questa fasa èsi savens memia tard per franar la circulaziun dals daners, ed ils daners èn pers.
Project da pilot da la Polizia chantunala dal Grischun
Per franar uschè baud sco pussaivel la circulaziun dals daners, va la Polizia chantunala dal Grischun novas vias. In dals facturs da success ils pli efficazis en connex cun l'activitad d'inquisiziun è quel da persequitar e d'interrumper la circulaziun dals daners. Per cuntanscher questa finamira è vegnida fatga ina cunvegna da collavuraziun cun ina firma spezialisada (Private-Public-Partnership PPP). La finamira è quella d'identifitgar e d'impedir en moda preventiva – cun agid da bancas da datas – transacziuns finanzialas fraudulentas. Da l'autra vart vegnan meglieradas cun quest partenadi las schanzas da bloccar sin plaun internaziunal uschè svelt sco pussaivel transacziuns da facultad gia fatgas. Per mantegnair las schanzas da success da quest proceder cusseglia la Polizia chantunala dal Grischun a las persunas donnegiadas da far uschè svelt sco pussaivel ina denunzia.
Infurmaziuns
La scheffa da la Polizia criminala da la Polizia chantunala dal Grischun, maiora Barbara Hubschmid, stat a disposiziun mesemna, ils 17 da mars 2021, da las 13.00 fin las 14.00, a las collavuraturas ed als collavuraturs da las medias per dumondas ed intervistas individualas. Coordinaziun dals termins fin las 11.00 sur e-mail info@kapo.gr.ch.
funtauna: motionarray.com