Grischun: Statistica criminala da la polizia 2020

Glindesdi avantmezdi ha la Polizia chantunala dal Grischun preschentà en ina conferenza da medias a Landquart la Statistica criminala da la polizia 2020. Il dumber total da delicts è sa reducì levamain en cumparegliaziun cun l'onn precedent. Er la quota da scleriment è positiva ed ha pudì vegnir augmentada danovamain cumpareglià cun l'onn precedent.

En il chantun Grischun èn vegnids registrads l'onn passà 8'826 delicts. Quai èn 197 damain che l'onn 2019. La tendenza mussa gia daditg vers engiu. La pli gronda part èn malfatgs cunter il Cudesch penal, numnadamain 6531 (onn precedent 6579). Per cumparegliar: L'onn 2009, cur che la Statistica criminala da la polizia è vegnida fatga per l'emprima giada tenor criteris da registraziun unifitgads en Svizra, èn vegnids registrads 8156 malfatgs cunter il Cudesch penal svizzer.

Tar ils delicts da violenza grevs è vegnì registrà in regress da 2 cas envers l'onn precedent (da 32 a 30). Quai èn 17 blessuras corporalas grevas, 11 violaziuns, 1 rapinament d'ostagis ed 1 rapina. Quests cas èn vegnids sclerids a 93 %. 92 % da tut ils delicts da violenza (onn precedent 93 %) èn vegnids sclerids. In dumber da delicts pli grond ha principalmain l'aglomeraziun da Cuira.

Augment da constricziuns, violenza, smanatschas cunter funcziunarias e funcziunaris sco er violenza a chasa

La gronda part dals delicts da violenza èn smanatschas, acts da violenza, blessuras corporalas simplas, baruffas, violenza resp. smanatscha cunter funcziunarias e funcziunaris sco er constricziuns. In augment è vegnì constatà tar las constricziuns (da 37 a 53 cas) e tar la violenza e la smanatscha cunter funcziunarias e funcziunaris (da 50 a 71 cas). En il rom da relaziuns sumegliantas ad ina famiglia è la violenza a chasa s'augmentada da 196 a 254 cas. 55 % da quests cas (onn precedent 50 %) pertutgan relaziuns actualas da pèrs resp. da partenaris.

Malfatgs cunter la facultad

61 % da tut ils delicts en il sectur dal Cudesch penal concernan malfatgs cunter la facultad, numnadamain 3950 (onn precedent 3970). La pli gronda part da quests malfatgs da facultad èn enguladitschs, numnadamain 1763 cas (onn precedent 1915).