Tar totalmain 1932 accidents da traffic èn mortas 12 persunas sin las vias grischunas l'onn 2020. 500 persunas èn vegnidas blessadas en accidents da traffic. En cumparegliaziun cun l'onn precedent correspunda quai ad ina reducziun da passa 18 pertschient. Quai resorta da la statistica actuala d'accidents da l'Uffizi federal da vias (UVIAS).
L'onn 2020 ha la polizia registrà totalmain 1932 accidents da traffic en il chantun Grischun. Quai correspunda ad in dumber cleramain pli bass che la media dals onns 2015 fin 2019 e dastga vegnir considerà sco fatg positiv, sch'ins resguarda ch'il dumber da vehichels en il chantun Grischun è creschì er l'onn passà per circa 2200 vehichels a motor.
Damain accidents cun donns da persunas e cun donns materials
Ils accidents cun donns da persunas èn sa reducids per 17,3 % e quels cun donns materials per 8,9 %. Main allegraivel è il fatg ch'il dumber da persunas mortas n'è praticamain betg sa midà (-1) cumpareglià cun l'onn precedent. En cumparegliaziun cun ils ultims 5 onns sa mussa puspè in augment dal dumber d'accidents da traffic che manischunzas e manischunzs da vehichels han chaschunà sut l'influenza d'alcohol. Sin las autostradas po vegnir registrada ina reducziun da 19 accidents (-24,8 %).
Damain accidents mortals cun motos e dapli accidents cun velos
Il dumber d'accidents cun motos è sa reducì cleramain en cumparegliaziun cun il nivel da l'onn precedent. Allegraivel è il fatg ch'igl ha dà ina reducziun tar il dumber da persunas disgraziadas mortalmain (-2) ed er tar il dumber da persunas grevamain blessadas (-24). Tar ils dumbers d'accidents cun velos e cun velos electrics sco er tar ils dumbers da persunas blessadas en tals accidents sa mussa in cler augment. 2 persunas èn mortas durant l'onn da rapport en accidents cun velos. Tar ils accidents da pedunas e peduns e tar las persunas blessadas en tals accidents sa mussa ina reducziun, ma tuttina ha stuì vegnir registrà 1 accident mortal.
Sveltezza memia auta e distracziun sco privels
185 accidents da traffic èn capitads pervia da sveltezza memia auta. Questa reducziun per 17,7 % mussa che l'activitad da controlla pli intensiva è sa cumprovada en quest sectur. In fatg è che la distracziun è anc adina – malgrà la leva reducziun da quests accidents durant l'onn da rapport – fitg derasada en il traffic sin via e ch'ella è in grond privel.
