Per bleras motociclistas e blers motociclists è la stad la pli bella stagiun da l'onn. Era quest onn als carmalan las temperaturas miaivlas puspè sin via. La Polizia chantunala dal Grischun fa tut il pussaivel per prevegnir ad accidents da moto pitschens e gronds.

Acziun da placats per lung da rutas attractivas
Cun plazzar placats da prevenziun per lung da las vias principalas dal Grischun vul la Polizia chantunala render attent tut las utilisadras e tut ils utilisaders da la via als privels da l'ir cun moto. L'acziun da placats ch'ella organisescha dapli blers onns ensemen cun l'Uffizi da construcziun bassa dal Grischun sa distingua tras ses motivs marcants e facils da chapir.

Tips per ir cun moto a moda segira

• Controllar avant che charrar che la moto n'haja nagins defects tecnics (pneus, frains, glisch, etc.). Elementar è er in bun stadi corporal e mental da la motociclista e dal motociclist.
• Charrar er il di adina cun glisch sbassada u glisch da circulaziun (obligatoric!). Quai augmenta la vesaivladad – cunzunt en cumbinaziun cun vestgadira clera u marcanta – ed il medem mument la segirezza en il traffic.
• Sa proteger da blessuras en cas da cupitgadas u collisiuns cun ina chapellina, guants e stivals, sco era cun ina giacca e chautschas cun protecturs.
• Charrar a moda prospectiva, colleghiala e defensiva sa paja e gida ad evitar accidents da traffic. Quai na vala sa chapescha betg mo per motociclistas e motociclists.
• Moderar il tempo na signifitga betg mo observar las prescripziuns legalas, mabain er adattar la sveltezza al traject, a las cundiziuns sin via ed a las atgnas abilitads da charrar.

Rinfrestgar la savida cun curs per augmentar la segirezza da charrar
Divers purschiders da curs sustegnan motociclistas e motociclists d'augmentar lur segirezza da charrar. Sut il patrunadi da la Polizia chantunala dal Grischun organisescha Driving Grischun, il center per la segirezza da charrar a Cazas, dapi numerus onns curs dad ir cun moto. Las responsablas ed ils responsabels cusseglian a las motociclistas ed als motociclists d'augmentar lur abilitads da charrar cun tals curs per amur da l'atgna segirezza. Era la gruppa da motociclistas e motociclists da la Polizia chantunala dal Grischun ha absolvì tals trenaments per esser pronta per la stagiun vegninta.