Dumengia han las polizias chantunalas da l'Uri, dal Tessin e dal Grischun organisà cuminaivlamain in'acziun da prevenziun d'accidents da moto sin il pass dal Lucmagn. L'acziun ch'è stada sut l'aspect da l'intermediaziun da savida è vegnida recepida en moda positiva da las participantas e dals participants.
L'ina va patgific cun la moto sin il pass e giauda – ultra dal traject attractiv – er curt la vista sin las muntognas. L'autra tira curvas in pau pli sportivas en direcziun da l'ospizi. Ed andetgamain: signals faudads a l'ur dal vial cun l'inscripziun "POLIZIA". In polizist fa segn a la ciclista da bandunar la via. Ella vegn retschavida amicablamain cun ils pleds "Allegra, Polizia chantunala, nus faschain in'acziun da prevenziun per motociclistas e motociclists".
Las polizias chantunalas da l'Uri, dal Tessin e dal Grischun cuminaivlamain en acziun
Ils trais corps da polizia vischins sa barattan sporadicamain davart temas da la polizia. Per l'onn 2021 han els decidì da s'engaschar puspè cun in'acziun cuminaivla en il cumbat cunter accidents da moto. Cun fotografias e cun videos d'accidents da traffic, cun extracts da la satistica d'accidents sco er cun discurs han polizists pudì dar vinavant savida davart la prevenziun d'accidents a ciclistas e ciclists. Ulteriuras infurmaziuns davart temas da moto han talas e tals survegnì a chaschun da l'acziun tras represchentants da la Gruppa d'interess moto (GI Moto) sco er tras represchentants da la Federaziun motociclistas e motociclists da la Svizra (FMS) e tras in magister d'autoscola tessinais.
Intermediaziun da savida recepida en moda positiva
Ils resuns pertutgant la lavur da prevenziun èn stads per la pli gronda part en il stil "Jau hai pudì emprender inqual chaussa nova, per exempel co che jau prend la curva en moda la pli segira" ubain "Cura che jau hai vis il signal da polizia, ha battì mes cor per in curt mument. Tant pli hai jau apprezià ils discurs amicabels e las infurmaziuns che promovan mia segirezza". Durant l'acziun che ha gì lieu da las 10.00 fin las 15.00 han pudì vegnir pledentads tut en tut var 200 motociclistas e motociclists cun l'intenziun da reducir il dumber d'accidents da traffic.
