La Polizia chantunala dal Grischun cuntinuescha sias mesiras per reducir accidents da moto e lantscha ina nova campagna da prevenziun. La finamira è da promover il pensar da segirezza dad ed envers motociclistas e motociclists.

Tranter il matg e l'october, pia durant la stagiun da motos sco tala, èn montads placats per promover la segirezza dal traffic per lung dals trajects da moto ils pli frequentads e nua ch'i capitan blers accidents. L'acziun da placats che vegn realisada dapi onns ensemen cun l'Uffizi da construcziun bassa dal Grischun sa drizza a tut las participantas ed ils participants dal traffic.

Placats en tut las linguas chantunalas
Per l'emprima giada èn ils placats – ultra dad en tudestg ed en talian – er disponibels en rumantsch. Ils motivs èn simpels e marcants. Cun dumondas chapiblas sveltamain u cun instrucziuns da cumportament vegnan las participantas ed ils participants dal traffic envidads d'applitgar ina moda da guidar segira.  Che l'ir cun moto en il chantun Grischun è ina sfida per manischunzas e manischunzs, mussan ils accidents da moto adina puspè. L'onn 2022 èn otg motociclistas e motociclists morts sin las vias dal Grischun.

Uschia va l'ir cun moto segir

• Garantir in stadi tecnic irreproschabel da la moto.
• Augmentar las abilitads da manischar e da sensibilisar sco er frequentar curs per la segirezza da charrar.
• Cunter blessuras en cas da crudadas u da collisiuns protegia vestgadira da moto adattada. 
• Cun in cumportament da charrar prospectiv, colleghial e defensiv da tut las participantas ed ils participants dal traffic sa laschan evitar accidents da traffic, pia er accidents da moto.
• Supplementarmain a las prescripziuns legalas sto er la sveltezza vegnir adattada al trassé, a las relaziuns da via ed a l'atgna abilitad da manischar.

Ils placats vegnan montads en passa 50 lieus per lung da las rutas da moto enconuschentas en il Grischun. Ultra da quai èn planisadas diversas acziuns sin ils ospizis dals pass u en lieus, nua ch'i capitan adina puspè accidents.

Ulteriurs motivs da la nova campagna da prevenziun sco PDF1 / sco PDF2 / sco PDF3 / sco PDF4