Buns implants d'infrastructura èn la pli impurtanta premissa per in'agricultura productiva. Senza vias da transport, aua u electricitad na po il terren agricul betg vegnir cultivà. La frequenza da cundiziuns da l'aura extremas s'augmenta pli e pli fitg e periclitescha las infrastructuras u la fritgaivladad dal terren. En quests secturs tematics èn quai savens mesiras da construcziun prospectivas che vegnan sustegnidas da la Confederaziun e dal chantun.

Meglieraziuns na duain dentant betg mo vegnir cuntanschidas areguard la tecnica da construcziun. Uschia duain vegnir realisadas ulteriuras mesiras sco l'optimaziun da l'urden da las parcellas e da la proprietad, la coordinaziun da dumondas da la planisaziun dal territori e la realisaziun da mesiras a favur da la protecziun da la natira e da l'ambient. Qua vai savens per process da planisaziun e da coordinaziun sco regruppaments dal terren, arrundaziuns da terren fittà, segiraziuns en il register funsil u process da svilup dal territori rural cun participaziun da divers acturs.