Sut l'aspect da la pandemia da COVID-19 ha il chantun Grischun incumbensà la Cuminanza d'interess per il turissem en il Grischun (ITG) da preschentar ideas durablas per mesiras d'impuls en l'economia turistica dal Grischun cun il suandant focus:

• Las ideas mainan ad in meglierament durabel da las cundiziuns generalas, da la resilienza e da la cumpetitivitad dal turissem grischun. Lavurs directas da sustegn e d'installaziun n'èn betg l'object da quest project.
  
• Las ideas na sa drizzan betg als furniturs da prestaziuns, mabain al plaun surordinà, per gronda part il maun public (en emprima lingia al chantun, punctualmain er a vischnancas ed a la Confederaziun) e federaziuns.
  
• I vegnan rimnadas ideas cun ina direcziun a lunga vista per stgaffir las basas per in svilup positiv dal turissem.
  
• Las ideas duain sa chattar en il champ d'influenza dal chantun e da las vischnancas.

Ensemen cun ina gruppa da lavur e cun represchentants da l'economia turistica e da federaziuns economicas vegnan analisadas, giuditgadas e priorisadas propostas da meglieraziun da la politica turistica. Sa basond sin quatter tesas èn s'etablidas 10 propostas concretas per meglierar las pussaivladads da svilup dal turissem grischun.

Program d'impuls per il turissem grischun (21-09-2021)
Giudicament da la situaziun da COVID-19 dal mars 2021 (15-03-2021)
Cumpendi Communicaziun intelligenta da corona (09-11-2020)

Plazza da martgà digitala dal Grischun

Corona ha mussà l'urgenza da la digitalisaziun en il turissem. La gruppa d'experts «Destinaziuns» dal Program d'impuls COVID per il turissem ha pervia da quai fatg in'analisa la stad 2020.

Bleras purschidas en il Grischun èn preschentas e reservablas sin differentas plattafurmas (p.ex. Tomas, Outdooractive, discover-swiss e.u.v.). Cun stgaffir ina plazza da martgà digitala pudess il giast s'infurmar e reservar fitg svelt sur ils cunfins da las destinaziuns. In management modern da datas da la clientella e l'administraziun da plazzas da martgà digitalas tutgan oz tar las incumbensas principalas d'ina organisaziun turistica. La decisiun per la gista plattafurma respectivamain in management optimal dals puncts da contact vegn engrevgiada da la diversitad da las purschidas.

Il cumpass ch'è ussa avant maun mussa, co ch'ils singuls sistems èn cumpatibels e colliabels. La prontezza da las destinaziuns da cooperar po pia vegnir augmentada cun evitar en il futur charas soluziuns insularas.

Preschentaziun generala Plazzas da martgà digitalas e management da las relaziuns cun la clientella (schaner 2021)
La preschentaziun generala po er vegnir consultada e chargiada giu sut www.systemcluster-gr.ch.