L'activitad da l'uniun Grischun Vacanzas è quella da gudagnar novs giasts per il Grischun sco regiun turistica e da persvader ils giasts existents da returnar adina puspè en il Grischun.
Grischun Vacanzas è l'organisaziun da marketing turistic dal chantun. Per incumbensa da la Regenza e da ses commembers s'engascha ella per in'economia turistica persistenta.
Per cuntanscher questa finamira vegn GRV
- a constatar ed ad analisar il cumportament da gruppas cun preferenzas specificas en centers da cumpetenza spezialisads da GRV ed al trair a niz activamain sco «motor» per il turissem.
- a tschertgar activamain ideas innovativas per il turissem en il Grischun, las giuditgar svelt e sistematicamain, las sviluppar vinavant e procurar per decisiuns da realisaziun.
- a metter a disposiziun manaders da project versads che sviluppan novs products en projects d'innovaziun cun grond potenzial surregiunal ensemen cun destinaziuns e furniturs da prestaziuns interessads ed als commerzialiseschan naziunalmain ed internaziunalmain.
- a commerzialisar la purschida turistica e sa focussar en quest connex sin temas che cumpiglian pliras destinaziuns.
- ad engrondir la purschida da servetschs per pussibilitar a las destinaziuns ed als furniturs da prestaziuns da pudair profitar en moda directa, simpla e senza gronds custs da tecnologias existentas e novas. Grazia a la standardisaziun ed a la scalaziun pon ils shared services vegnir offrids en moda favuraivla per ils partenaris (pretschs pli bass ch'ils pretschs regulars dal martgà) e per GRV en ina moda che cuvra ils custs.
Tar la realisaziun da questas mesiras sustegna il chantun GRV – sa basond sin ina incarica da prestaziun – cun ina contribuziun chantunala annuala da 7,5 milliuns francs.