En il Grischun vegnan discurridas trais linguas uffizialas: tudestg, rumantsch e talian.

Tenor l'enquista da structura 2022 han inditgà 73,2 pertschient da las persunas interrogadas tudestg sco lingua principala, 14,1 pertschient rumantsch e 13,2 pertschient talian. Cun ina quota da 4,1 pertschient è il portugais sin plazza quatter da las linguas principalas.

A chaschun da l'enquista da structura annuala vegnan interrogadas mo persunas da la populaziun permanenta a partir da 15 onns che vivan en ina chasada privata. L'emprova da controlla cumpiglia en il Grischun var 5'000 persunas (Svizra: min. 200'000), uschia che tut ils resultats èn provedids cun in interval da confidenza.

Las persunas interrogadas pon ultra da quai inditgar pliras linguas principalas, fin trais indicaziuns per persuna vegnan resguardadas. La cumparegliabladad cun la dumbraziun dal pievel 2000 da pli baud è pervia da quai restrenschida in pau en quai che pertutga la dumonda da las linguas.

L'onn 2022 han 38,9 pertschient da la populaziun permanenta sur 15 onns inditgà d'appartegnair a la baselgia catolic-romana, 28,5 pertschient da las persunas interrogadas a la confessiun evangelic-refurmada. Pia han 7 da 10 persunas inditgà, d'esser commembra u commember d'ina da las duas grondas baselgias chantunalas, cleramain dapli ch'èn la media svizra.