La charta da Dufour è stada l'emprima ovra cartografica uffiziala da la Svizra. En il context da la collavuraziun militara avevan ils chantuns cumenzà a partir dal 1809 cun mesiraziuns pli exactas, a partir dal 1832 è il maister da quartier colonel Guillaume Henri Dufour (1787-1875) stà en funcziun sco „Directeur de la Carte“, a partir dal 1838 daventa ses biro a Genevra il „Eidgenössisches Topographisches Bureau der Schweiz“ (oz swisstopo) e po uschia valair sco in dals emprims „uffizis federals“.

Ils emprims dus da tut en tut 25 fegls èn vegnids publitgads il 1845, pia anc avant la fundaziun dal stadi federal (Genevra/Losanna e Vevey/Sion). Las emprimas ediziuns dals ulteriurs fegls èn suandadas fin l'onn 1865; fin il 1939 è l'ovra vegnida actualisada. Ils fegls che cuvran il territori dal Grischun (fegls XIV, XV, XIX e XX) èn vegnids publitgads ils onns 1853 fin 1859.

Per la naschientscha dal stadi federal vala la charta da Dufour sco document-clav. Ella anticipescha il nov stadi federal. Las lingias dals cunfins chantunals èn ussa pli finas, cleramain visibel è il cunfin dal pajais. La charta sco resultat d'ina collavuraziun chantunala omogena per l'entir pajais illustrescha era dal punct da vista organisatoric il stadi federal avant ch'el naschia per propi.

L'onn 1847 ha Henri Dufour manà sco general las truppas federalas en la curta guerra civila ch'è ida a fin cun la dissoluziun da la Lia separatista da set chantuns catolics.