Ils 18 da december 2024 èn var 27 emprendistas ed emprendists da l'administraziun chantunala dal Grischun s'inscuntrads sin la plazza da glatsch Quader a Cuira. L'inscunter è vegnì organisà da las emprendistas e dals emprendists da l'Uffizi da persunal dal Grischun. Sper ir cun patins avain nus er bavì punsch. Da questas temperaturas fraidas ha quel procurà per ina chalur agreabla. Igl è stà ina bella variaziun dal mintgadi, che tuts han pudì giudair en in'atmosfera lucca e cuntenta.

Sin la plazza da glatsch avain nus ris bler ed empruvà or dal tut. Intgins han mussà sauts impressiunants sin ils patins, entant ch'ils auters han – cun sustegn dals amis – fatg emprimas rundas. Mintgin è sa divertì, e l'atmosfera lucca ha facilità da stabilir novs contacts.

Las pausas èn vegnidas nizzegiadas per baterlar in cun l'auter, per emprender d'enconuscher meglier in l'auter e per rir ensemen sur da las pitschnas pannas sin il glatsch.

L'occurrenza è stada organisada bain ed è vegnida stimada da tuttas e tuts sco variaziun bainvegnida. Igl è stà in suentermezdi che resta en memoria e che ha mussà, quant impurtantas che la cuminanza e la coesiun èn er en il mintgadi d'emprender. Igl è stà in suentermezdi fitg bel e nus tuttas e tuts avain gì fitg grond plaschair.