Cliccai ils singuls titels per survegnir dapli infurmaziuns davart il tema.

Significaziun e finamira d'in management da reabilitaziun

Ina greva malsogna u in accident metta la patruna u il patrun sco er las collavuraturas ed ils collavuraturs davant grondas sfidas. La guariziun ed il return en il mintgadi professiunal e privat stattan en il center. En quest process sustegnain nus Vus cun noss management da reabilitaziun cumplessiv ed integral.

Las collavuraturas ed ils collavuraturs ch'èn vegnids malsauns u che han gì in accident accumpagnain nus en situaziuns medicinalas, professiunalas e socialas difficilas, promovain lur guariziun e gidain a sa reintegrar en la professiun. La finamira è quella, ch'ellas ed els possian puspè fitgar pe e manar ina vita autodeterminada.

Nus As purschain agid per l'agid a sasez ed ans focussain sin Vossas fermezzas ed abilitads. Tenor Voss basegns organisain e coordinain nus per Vus Vossa reintegraziun cun las medias ed ils medis, cun las terapeutas ed ils terapeuts, cun las assicuranzas, cun las patrunas ed ils patruns sco er cun autras persunas da contact impurtantas. Nus As sustegnain, sche Vus stuais contactar autoritads, e surpigliain en quest connex ina rolla da coordinaziun e d'intermediaziun.

Nus As gidan a stabilir ed ad observar ina structura dal di. Ensemen cun Vus tschertgain nus soluziuns pragmaticas e duraivlas per returnar en la vita professiunala.

Nossa finamira è quella d'As reintegrar en il process da lavur, d'As dar enavos la qualitad da viver usitada u eventualmain d'As preschentar novas perspectivas.

Nossas fermezzas

• Know-how spezialisà che sa referescha al cas
• Valitaziun persunala da la situaziun
• Coordinaziun da las persunas participadas
• Basas per giuditgar il duair da prestaziun
• Infurmar a temp davart il decurs
• Recumandaziuns davart l'ulteriur proceder
• Nus As tadlain.

Decurs d'in management da reabilitaziun

Il pli tard suenter in'absenza da passa 6 dis da lavur in suenter l'auter u da 21 dis da lavur durant in onn chalendar pervia d'ina malsogna u pervia d'in accident, sto la superiura u il superiur contactar la collavuratura u il collavuratur pertutgà. Per annunziar in cas sto vegnir emplenì ed inoltrà il formular per l'emprim discurs. Infurmaziuns respectivas èn cuntegnidas en l'instrucziun detagliada.

Malsogna

Absenzas pervia da malsogna ston vegnir communitgadas immediatamain a la superiura u al superiur resp. al post da servetsch. Absenzas da passa 5 dis da lavur ston medemamain vegnir cumprovadas visavi la superiura u il superiur cun in attest da la media u dal medi.

Basas giuridicas

Ordinaziun dal persunal art. 38

Accident

A las infurmaziuns detagliadas areguard accidents.

Cuntinuaziun dal pajament dal salari

As infurmai davart la cuntinuaziun dal pajament dal salari en cas d'in impediment da lavurar pervia da malsogna u pervia d'accident.