Il Leadership Forum (LSF) è in'occurrenza annuala che dat la chaschun da discutar sin plaun interdepartamental davart temas actuals e davart sfidas dal temp e da sa barattar experientschas.
«Cuminaivlamain per il Grischun» – Questa visiun ch'è vegnida sviluppada da la Regenza e dal chancelier en il rom d'in lavuratori communabel, definescha la finamira a lunga vista per l'administraziun chantunala sco organisaziun ed il rom da la futura Strategia da HR. Il LSF da quest onn è stà sut la devisa «Cuminaivlamain per il Grischun». Il program cumpigliava temas culturals e valurs culturalas. I dueva vegnir fatg in emprim pitschen pass en questa direcziun cun elavurar valurs culturalas cuminaivlas che fan avanzar la basa per sviluppar vinavant l'administraziun chantunala sco organisaziun. Il mund da lavur è suttamess a midadas permanentas, las midadas capitan svelt e bleras giadas na sa laschan ils futurs svilups er betg prevair. Consequentamain èsi impurtant ch'er l'administraziun chantunala sco organisaziun sa fatschentia cun la dumonda, tge valurs e tge tenutas che duain vegnir tgiradas e vividas per pudair sa mover ed er sa sviluppar en quest ambient che sa mida svelt.
En il podium han la commembra ed ils commembers da la Regenza reflectà dumondas davart la Strategia da HR e davart la cultura, ed els èn vegnids interrogads davart lur tenuta pertutgant differents temas. Suenter il podium hai dà quest onn sco novaziun per l'emprima giada Cafés da departament: Per etablir ina cultura communabla èsi essenzial da guardar mintgatant sur il piz dal nas ora e da sviluppar in sentiment per quai ch'è gist actual en ils auters secturs. Als Cafés da departament èn vegnidas dadas invistas dals temas captivants che occupan actualmain ils departaments. Il directur da turissem dad Arosa, Roland Schuler, e la presidenta communala dad Arosa, Yvonne Altmann, han raquintà per finir l'emprim di, co ch'il viadi cuminaivel dad Arosa-Lai ha cumenzà, tge sfidas ch'els han inscuntrà e co che lur via communabla è stada fin ussa.
Il segund di ha cumenzà cun dus referats d'impuls da Hans Rusinek e dad Ines Hartmann. A las participantas ed als participants ha Hans Rusinek dà ina invista dal mund da lavur dal futur. Ines Hartmann ha dà impuls a tut las participantas ed ils participants, co che l'administraziun chantunala po trair a niz meglier il potenzial da l'entir pool da talents e tge premissas ch'i dovra per quest intent. En in lavuratori èsi silsuenter stà central da sviluppar valurs cuminaivlas, ch'èn vegnidas elavuradas en discussiuns interessantas. La finala ha l'ambassadur dal futur, Jörg Eugster, accumpagnà las participantas ed ils participants sin in viadi e preschentà en ina moda e maniera frestga ils munds digitals.
