Mandats d'arrest publics da temps passads, documents istorics, unifurmas ed armas veglias e las pli novas, ma er perditgas dals cas criminals sensaziunals dals ultims onns èn exponids en il museum da la polizia grischuna. Bleras illustraziuns e blers objects raquintan chaussas plain tensiun, chaussas commoventas e divertentas e chaussas tragicas da l'istorgia da passa 200 onns da la polizia chantunala grischuna. Utensils d'infracturs, armas d'assassinats u valischs plainas da daners fauss, fotografias da lieus dal delict e fastizs fan regurdar ad acts criminals che han procurà da lur temp per grondas agitaziuns. Il gir tras il museum da la polizia grischuna mussa er cleramain il svilup rasant dal traffic sin via.

Infurmaziun visitader

Daglindesdi fin venderdi (08.30 – 16.30) exista la pussaivladad da vegnir manà tras il museum da polizia. La gruppa cumpiglia almain 5 e maximalmain 15 persunas. Per dumondas – almain 14 dis ordavant – duvrai per plaschair il suandant formular:

Formular d'annunzia

Plinavant po il museum da polizia vegnir visità senza preannunzia mintga emprim mardi dal mais (dano firaus cumandai), da las 14.00 fin las 17.00. Nus vulessan render attent ch'i vala da princip ina vegliadetgna minimala da 15 onns per visitar il museum da polizia. Quai, perquai ch'i vegnan per part mussads exponats che n'èn betg en mintga cas adattads per uffants. Sche Vus visitais il museum cun uffants pli giuvens, faschais Vus quai en atgna responsabladad. Il museum è cuntanschibel cun sutga cun rodas e sur in ascensur.