Investigaziun Cuira

Tar l'Investigaziun Cuira s'occupan «allrounders da la polizia» cun il scleriment da delicts en la citad da Cuira ed en ses conturns. Els tschertgan delinquentas e delinquents sco er persunas sparidas. Las collavuraturas ed ils collavuraturs da l'Investigaziun Cuira sclereschan ultra da blers auters delicts cunzunt er enguladitschs sco er infracziuns e controlleschan la scena da drogas en la citad da Cuira.

A l'Investigaziun Cuira è affilià il servetsch da giuvenils. Quel s'occupa da proceduras penalas cunter persunas minorennas. En quest connex lavuran las collavuraturas ed ils collavuraturs stretgamain ensemen cun la Procura per giuvenils ed ulteriuras autoritads. Er la prevenziun ha ina gronda impurtanza en la lavur quotidiana.

In ulteriur element da l'investigaziun è il post spezialisà Violenza a chasa. Las collavuraturas ed ils collavuraturs procuran che cas da violenza a chasa vegnian tractads en moda professiunala en il chantun Grischun ed èn l'emprim post da contact per dumondas specificas. Ellas ed els tgiran ina stretga collavuraziun cun autras autoritads ed instituziuns privatas.

Investigaziun interna / administraziun criminala

L'incumbensa da l'Investigaziun interna è la valitaziun da tut las enconuschientschas polizialas. Quella las trametta vinavant a las basas da la polizia ed als servetschs spezialisads per l'inquisiziun. Ultra da quai garanteschan las collavuraturas ed ils collavuraturs da l'Investigaziun interna che las actas polizialas vegnian tramessas confurm al temp, en moda coordinada e d'auta qualitad a tut ils posts da servetsch che tractan ils cas penals respectivs. Latiers tutgan las basas da la polizia, servetschs da retschertga interns, la procura publica, savens dentant er auters chantuns, autoritads federalas ed uffizis a l'exteriur.